ڕێژیم بۆ چاوترسێنکردن و تۆقاندنی خەڵک لەسەر ڕێگای هاووڵاتییان خاڵی پشکنین دادەنێت.
بەپێی هەواڵی گەیشتوو بە ماڵپەڕی "کوردستان میدیا"، هێزێکی لیباس شەخسی لەسەر ڕێگای هاتوچۆی نێوان "سقز- بۆکان" خاڵی پشکنینیان داناوە.
لەو خاڵە پشکنینەدا هێزەکانی ڕێژیم خەڵک ڕادەگرن و دەیانپشکنن و مۆبایلەکانیشیان کۆنترۆڵ دەکەن. هەروەها خەڵک ڕادەگیرێن و لێپرسینەوەیان لێ دەکرێت کە هەندێک کەس پاش کاتژمێرێک ڕاگیران و لێپرسینەوە ئازاد دەکرێن.
ڕێژیم هەرجارە و لە شوێنێکدا بە مەبەستی زیاتر ئەمنییەتیکردنەوەی کەشی شارەکان و ترساندن و تۆقاندنی خەڵک، خاڵی پشکنین دادەنێت و هەڵدەکوتێتە سەر خەڵک.
ئەمە نیشان دەدات ڕێژیم لە دۆخێکی مەترسیداردایە و لە ناڕەزایەتی و خۆپیشاندانی خەڵک دەترسێت، بۆیە هەوڵ دەدات هێزی خۆی بە خەڵک نیشان بدات.
