کوردستان میدیا: ڕێژیمی ئێران بە ڕێ‌وشوێن دیاریکردن بۆ زانایانی ئایینیی کوردی ئەهلی سوننەت لە ناوچە کوردنشینەکاندا، ڕۆژ بە ڕۆژ زۆرتر گوشاریان بۆ دەهێنێت و داوای هاوکارییان لێ دەکات.
سپای تێرۆریستی پاسداران بۆ وتارەکانی نوێژی هەیینیی مزگەوتەکان بۆ مامۆستاکان ڕێ‌وشوێن دیاری دەکەن و وتارەکانی خۆیان بۆ مامۆستایان بەڕێ دەکەن و داوایان لێ دەکەن کە ئەو وتارانە بخوێننەوە و ئەگەر ئەو کارە نەکەن بانگهێشت دەکرێن و سزا دەدرێن.
هەروەها سپای تێرۆریستی پاسداران بە جلی ئاساییەوە و بە ئامادەبوون لە مزگەوتەکاندا، چاوەدێریی هەڵسوکەوت و وتارەکانی مامۆستایان دەکەن.
هەروەها ئەو مامۆستایانەی کە دژی سپای تێرۆریستیی پاسداران هەڵوێست دەگرن، لە کارەکەیان دوور دەخرێنەوە و ئەوانیش بۆ بژێویی ژیانیان ڕوو دەکەنە کرێکاری و کۆڵبەری و ڕۆژ بە ڕۆژ ڕێژەی ئەو مامۆستایانە ڕوو بە زیادبوونە.
سیاسەتی سپای تێرۆریستی پاسداران بۆ دزەکردنە نێو چین و توێژەکانی کۆمەڵگای کوردستان بەردەوامە و ئەم کارانەی بە زەبری سەرکوت و هەڕەشەکردن بەرەو پێش دەبات.
