بەشێک لە بەرهەمەکانی شەهیدێکی کوردستان لە ژێر ناوی "شێعرەکانم" چاپ و بڵاو کرایەوە.
بەشێک لە بەرهەمەکانی شەهیدێکی کوردستان لە ڕیزەکانی حیزبی دێموکراتی کوردستانی ئێران لە کۆمیتە شارستانی مەریوان، لەلایەن "کامیل مەلەکی" چاپ و بڵاو کرایەوە.
بەشێک لە بەرهەم و شێعرەکانی هونەرمەند ئەمجەد مەلایی ناسراو بە مامۆستا کۆڵنەدەر، کە لەلایەن کامیل مەلەکی، ئەندامی حیزبی دێموکراتی کوردستانی ئێران لە کتێبێکدا بە ناوی "شێعرەکانم" کۆ کراوەتەوە، چاپ و بڵاو کرایەوە.
کامیل مەلەکی، چەند ساڵە خەریکی کۆکردنەوەی شێعرەکانی مامۆستا کۆڵنەدەرە و ماندووبوونێکی زۆری پێوە کێشاوە.
هونەرمەند ئەمجەد مەلایی، ناسراو بە "مامۆستا کۆڵنەدەر"، شەهیدی کوردستان و پێشمەرگەی حیزبی دێموکراتی کوردستانی ئێران، شاعیر، نگارکێش و شانۆکار، خەڵکی ئاوایی "جانەوەرە" سەربە شارستانی مەریوانه.
ناوبراو ساڵی ١٣۵٠ی هەتاوی لەدایک بووە و لە ٢٣ی گەلاوێژی ساڵی ١٣٧۶ی هەتاوی، لە شاری سلێمانیی باشووری کوردستان، لەگەڵ پێشمەرگەیەکی دیکە بە ناوی "غالب عەلیزادە" کەوتنە بەر پەلاماری تیمە تێرۆریستییەکانی ڕێژیمی ئێران و شەهید کران.
