کوردستان میدیا: کۆمپانیای ئۆتۆمبیلسازیی ڤۆلکس واگۆن، چالاکییەکانی خۆی لە ئێراندا ڕادەگرێت.
کۆمپانیای ئاڵمانیی ڤۆلکس واگۆن بە هۆی گەمارۆوەکانی ئامریکا بۆ سەر ڕێژیمی ئێران، زۆرینەی چالاکییەکانی لە ئێراندا ڕادەگرێت و بەپێی ڕاپۆرتی هەواڵدەریی بلومبرگ، بەڕێوەبەرانی ئەو کۆمپانیایە دوای دانیشتن لەگەڵ باڵوێزی ئامریکا لە برلین، ئەو بڕیارەیان داوە.
ئەو کۆمپانیایە کە پاش ١٧ ساڵ کشانەوە لە بازاڕەکانی ئێراندا و لە دوای ڕێککەوتننامەی بەرجام لە ساڵی ٢٠١٧ زایینی، پرۆژەی هاوکارییەکانی لەگەڵ ئێران واژۆ کردبوو، دیسان چالاکییەکانی خۆی لە ئێران ڕاگرت.
پاش دەستپێکردنەوە و تەندتربوونەوەی گەمارۆوەکانی ئامریکا بۆ سەر ڕێژیمی ئێران، کۆمپانیا دەرەکییەکان بەتایبەت کۆمپانیا ئوروپایییەکان لە کشانەوە لە ئێران بەردەوامن و هەتا ئێستە ٥٢ کۆمپانیای ئورووپایی لە ئێران کشانەتەوە کە زۆرینەیان کۆمپانیاکانی فەڕانسە و ئاڵمانن.
