دوکتور "غوڵامعەلی ئیدریسییان" مێژوونووس و مامۆستای بەناوبانگی گەلی کورد، خەڵکی شاری سنە ماڵاوایی لە ژیان کرد.
دوکتور "ئیدریسییان"ساڵی ١٣١٢ی هەتاوی لە شاری "سنە" چاوی بە دونیا هەڵێناوە.
خوێندنی سەرەتایی و ناوەندیی هەر لە شاری "سنە" تەواو کردووە و دواتر لیسانسی لە ڕشتەی "مێژوو"دا لە زانکۆی تاران بەدەست هێناوە.
ناوبراو بۆ درێژەی خوێندنەکەی ڕووی لە وڵاتی فەڕانسە کردووە و لە زانکۆی "سوربۆنـ"ـی پاریسدا، دوکتورای مێژووی بەدەست هێناوە.
دوکتور "غوڵامعەلی ئیدریسییان" ساڵی ١٣٥٧ی هەتاوی سەرۆکی زانکۆی مەشهەد و خەریکی وانەوتنەوە بووە و دواترگەڕایەوە بۆ زانکۆی "سوربۆن".
ئەو مامۆستا بەناوبانگە لە زانکۆی "بۆرۆکلیـ"ـی ئامریکا وەکوو مامۆستای لێکۆڵەر دەست بەکار بووە و بەرهەمی لێکۆڵینەوەکانی خۆی لەبارەی کوردستانەوە لە کتێبی "کورد و کوردستان لە هەزارەکانی پێش مێژوو"، چاپ و بڵاو کردەوە.
تەرمی دوکتور "غوڵامعەلی ئیدریسییان" لە شاری "سنە" ئەسپەردەی خاک کرا.
