کوردستان میدیا

پێنجشەممه 6ی پووشپەڕ 2719
ماڵپەڕی ناوەندیی حیزبی دێموکراتی کوردستانی ئێران

گرانبوونی بەرهەمە خۆراکییەکان درێژەی هەیە

11:45 - 22 جۆزەردان 2719

کوردستان میدیا: نرخی ڕۆنی گیایی بە ڕێژەی ١٠ لەسەد لە بازاڕ و کارگەکاندا  گرانتر بووە.

بەپێی هەواڵێکی بڵاوکراوە لە ماڵپەڕی حکوومەتیی "تەسنیم"، کارکۆمەڵی کۆنترۆڵی بازاڕ، نرخی نوێی بە کارخانەکانی ڕۆنی گیایی ڕاگەیاندووە و  بە ڕێژەی ٩ هەتا ١٠ لەسەد گرانتر بووە.

کارکۆمەڵی کۆنترۆڵی بازاڕ، هۆکاری گرانبوونی ڕۆنی بۆ بەرزبوونەوەی تێچووەکانی گواستنەوەی ئەرز و  نرخی مەوادی بەستەبەندی گەڕاندووەتەوە.

لە ماوەی یەکساڵی ڕابردوودا، بازاڕی ئێران گرانبوونێکی لەڕادەبەدەری بە خۆیەوە بینیوە و هەر ڕۆژەو هەواڵی گرانبوونی شتێک بڵاو دەبێتەوە.

بەشێکی زۆر لە خواردەمەنییەکان لە سفرەی خواردنی بنەماڵەکان وەلا نراون و خەڵک توانای دابینکردنیانی نییە.

هێڵی هەژاری لە ئێراندا، لە ۱۲ لەسەدەوە گەیشتووەتە ۵۰ لەسەد و نیوەی خەڵکی ئێران بەتەواوەتی لە ژێر هێڵی هەژاریدا دەژین و بەهای هێڵی هەژاری گەیشتووەتە ۶ میلیۆن تمەن، بەڵام بەو حاڵەشەوە ڕۆژبەڕۆژ بەهای پێداویستییەکانی ژیان و نرخی بازاڕەکان، ڕوویان لە هەڵکشانێکی بەرچاو و خێرایە.