کوردستان میدیا: قەیرانی ئابووری و گرانیی نرخی پێداویستییەکان لە بازاڕەکانی ئێراندا، ڕووی لە هەڵکشانی زیاتر کردووە و ئەمجارە نرخی هەر شانە هێلکە، گەیشتووەتە ٢٠ هەزار تمەن.
گرانی لە سیستمی ئابووریی ئێراندا، ڕووی لە هەڵکشان بووە و نرخی پێداویستییەکانی ژیان لە بازاڕەکاندا ڕۆژبەڕۆژ پەرە دەستێنێت و لە دوای پەسەندکردنی گەمارۆوە ئابوورییەکانیش دژی ڕێژیمی ئێران، نرخی کەلوپەلە سەرەتایییەکان و ماددە خۆراکییەکان، چەندین قات بەرز بووەتەوە.
بەپێی ڕاپۆرتە بڵاوکراوەکان، هەموو ساڵێک بە هاتنی وەرزی گەرما، نرخی هێلکە و هەندێک لە ماددە خۆراکییەکان دادەبەزی، بەڵام لە ماوەی چەند ڕۆژی ڕابردوودا، نرخی هەر شانە هێلکە، گەیشتووەتە ١٨ تا ٢٠ هەزار تمەن.
ڕێژیمی ئێران لە ماوەی ڕابردوودا بۆ چەواشەکاریی زیاتر و بەناو پشتگیری لە بەرهەمهێنەرەکان، هەناردەکردنی هێلکەی بۆ دەرەوەی ئێران ئازاد کرد، تا پێش بە زەرەر و زیانەکانی بگرێت، بەڵام بەپێی ئامارەکان، نەتەنیا پێشی بە زیانەکان نەگرتووە، بەڵکوو گرانی و زیانەکانیشی، ڕووی لە زیادبوون کردووە.
گوشاری گرانییەکان گەیشتووەتە ئاستێک کە خەڵکی ئەو وڵاتە توانایی کڕینی شتومەک و خواردەمەنییەکانیان نەماوە و گرانیی ۵۱۱ لەسەدیی پیواز، ۲۲۸ لەسەدیی ڕوب، ۱۰۰ لەسەدیی شەکر، ٣٣ لەسەدیی هێلکە و ۹۳ لەسەدیی ڕۆن، چەند نموونەیەکی بچووکن لەم هەڵکشانانە.
