لافاولێدراوانی گوندەکانی "زاج و داربەست" لە پارێزگای "هۆرمۆزگان"، لە بارودۆخێکی خراپدا ژیان بەسەر دەبەن و گەرما و دووپشک هەڕەشەی جیددین بۆ سەر ژیانی کەمپی لافاولێدراوانی ئەو دوو گوندە.
بە هاتنی وەرزی هاوین و گەرمای ٥٠ پلەیی و نەبوونی کەلوپەلە فێنککەرەوەکان، خەڵکی لێقەوماوی دوو گوندی "زاج" و "داربەستـ"ـی زیاتر لە جاران تووشی کێشە و چەندین جۆری نەخۆشی کردووە.
هەروەها بوونی دووپشک لەو کەمپانەدا ژیانی خەڵکی لافاولێدراوی خستووەتە مەترسییەوە و تەنگی بە خەڵکی ئەو کەمپانە هەڵچنیوە.
لە ڕێکەوتی ٢٠ی بەفرانباری ١٣٩٨ی هەتاوی، گوندەکانی "زاج" و "داربەست" لە پارێزگای "هۆرمۆزگان" کەوتە بەر لافاو و زەرەر و زیانێکی زۆری گیانی و ماڵیی بەدواوە بوو. خەڵکی ئەو دوو گوندە کە ٧٠٠ کەسن لە کەمپێکدا نیشتەجێ کراون.
