کوردستان میدیا

شەممه 25ی خەزەڵوەر 2719
ماڵپەڕی ناوەندیی حیزبی دێموکراتی کوردستانی ئێران

ئەستێرەکەمان درەوشایەوە

18:20 - 24 گەلاوێژ 2719

مەلا برایمی مەجیدپوور

حیزبی دێموکراتی کوردستانی ئێران لـە ٢٥ی گەلاوێژی ساڵی  ١٣٢٤ی هەتاوی  دامەزرانی بەڕەسمی ڕاگەیەندراوە. یەکەمین حیزبی کوردییە کە بە شێوەی مودێڕن و ڕێکخراوەیی، بە ئامانجی دابینکـردنی مافی  نـەتـەوایـەتی و دێـمـوکراسی دامەزراوە. حیزبێکە لـە پـرۆسە و بەرنامەکەیدا  ویست و داخوازیی سەرجەم  چین و توێژ و دانیشتووانی کوردستانی تێدا گونجێندراوە. هەر بـۆیەش هەمووان بە هی خۆیان دەزانن و چاوەڕوانییان لێی هەیە. ئەوەش بە مانای ئەوە نییە کە حیزب و سازمانی تری لێ نین.

حیزبێکە باوەڕی قووڵی بە پێکەوەژیانی هێمنانە و برایانە هەیە و هەوڵیشی بۆ داوە.  حیزبێکە چارەی خۆنووسی و دابینکردنی مافی نەتەوایەتی، ئامانجی سەرەکییەتی و بۆی تێکۆشاوە و دەکۆشێت. بـۆ گەیشتن بەو ئامانجە و پاراستنی هێمنی و ئارامی، بە قۆناغی جۆراوجۆردا تێپەڕیوە و لافاوێکی لە خوێنی باشترین ڕۆڵەکانی لێ هەستاوە. حیزبێکە لە بەرانبەر پێشێلکردنی ماف و کەرامەتی گەلەکەی لە لایەن هەر دەسەڵات و حیزب و تاقمێک بووبێت، بیدەنگ دانـەنیشتووە و پشتگوێی  نـەخستووە. 

ڕێگەی نەداوە و  ڕێگەش نادات بەبێ پرس و ڕای  زۆرینەی گەل، هیچ حیزب و تاقم و کەسایەتییەک خۆی بکات بە وەکیل، یان ساتوسەودا بە چارەنووسی گەل بکات.  حیزبێکە ڕای وایە  گەل سەروەرە و بڕیار بەدەستە و چارەنووس و ڕێبازی کۆتاییش هەر گەل دیاریی دەکات.

شانازییەکی  گەورەیە  بـۆ ئـەو حیزبە کە  دامەزرێنەری  کۆماری کوردستانە، ئاڵای کوردستانی هـەڵکردووە، دامەزرێـنەری  هێزی  پێشمەرگەی  کوردستانـە. مەزنترین  و لێهاتووترین  ڕێبەرانی  کە لەو ڕێگایەدا بــوونەتە   قوربـانی،  شایەت و بەڵگەی  حاشاهەڵنەگرن و لە مێژووشدا  بۆیان تۆمار کراوە.

حیزبێکی بە مانای وشە شۆڕشگێڕ، خاوەن ئیمانێکی  قووڵ و بەهێز بـە ئازادی  خولیای دابینکردنی دێموکراسی بۆ نیشتمانەکەی و بڕوایەکی  پتەو بە سەرکەوتن، پابەندبوون بە هاوکاریی گەلانی  چەوساوە، هاوڕێ و هاوکاریی لەگەڵ ئاشتیخوازان.  مێژوو شایەتە لەو بوارانەدا بـە قەدەر تـوانای خۆی  دریـغی نـەکردووە و هەرگیز بە دژی ئازادیخوازان  پاڵی  بە دوژمنانەوە  نەداوە. لە ڕێگای وەدەستهێنانی مافی گەلەکەی بە شێوەی ئاشتییانە گەورەترین و لێوەشاوەترین ڕێبەرانی خۆی  لەدەست داوە. لە بەرنامە و پێڕەوی خۆیدا ڕێزی بۆ هەموو ئیدە و ئایینەکان داناوە. هەر چەشنە دیکتاتۆری و سەرەڕۆیی و تاکپەرستی و پاوانخوازی مەحکووم  کردووە.

حیزبی گەلاوێژە و  لە ئاسمانی  کوردەواری  دەدرەوشێتەوە، لە بـەر چاوان ون دەبێت بەڵام لە دڵ و دەرووندا  بـە زیندوویی ماوە. وەک دار بەڕوو وایە، گەڵای دەوەرێت بەڵام ڕەگ و ڕێشەی هەروا بە پتەوی ماوە.  ئەگەر بۆ ماوەیەک دیار نابێت لە کاتی خۆیدا گەشاوەتر لە جاران سەر هەڵدەداتەوە، شەوق و  شەبەقی  پەخش دەکات، بە دوژمنان دەڵێت: "وامەزانن کورد مردووە ، کورد زیـندـووە و هەروا مـاوە". حیزبێکە گەورەترین شانازیی ئەوەیە کە لە بڕیارداندا سەربەخۆیە، لە بەستراوەیی  بـێـزارە. دەکەوێت و  هـەڵـدەستێتەوە.  دەڕواتـە پێش  و بـۆ تاکتیک  جـاروبـارەش دەگەڕێتەوە،  بـە پێی  هەلومەرج  کەم دەبێت و زۆر ناخایەنێت  لە پێشوو زیاتر دەبێتەوە. هەڵە و خەتاش دەکات، بەڵام هەر کە هەستی  پـێکرد  دانـیان  پیدا دەنێت و دووپاتیان ناکاتەوە. ئەوەی هەر دەمێنێت گەلە، هەتا گەلیش هەبێت، حیزب ماوە.

بـە بـۆنەی ئـەو  ڕۆژە پـیـرۆزە، پـیرۆزبـایی  لـە شەهیدان  و بـنەماڵەکانـیان، زیندانیانی  سیاسی و کەسوکاریان، سەرجەم گەلی کورد و پێشمەرگەی حیزبی دێموکراتی کوردستانی ئێران و هاوڕێ و هاوسەنگەران، خەمخۆرانی گەل و دڵسۆزان دەکەم . ئاواتەخوازم  گەل سەرکەوێت و ئێمەش چاومان پێی بکەوێت.

ناوەڕۆکی ئەم بابەتە را و تێبینیی نووسەرە و ماڵپەڕی کوردستان میدیا لێی بەرپرسیار نییە.