دیار
لە وەختییگ ک کوردستان داگیر کریاس، نەتەوەی کورد نەچینەسە ژیر بار داگیرکاری و وە بەردەوامی هەول دانە و موبارزە کردنە ئەڕای ئازادی و بڕین دەس داگیرکەر لە وەڵات.
وەختییگ نوڕیمنە دیروک خوەمان دوێنیمن ک نەسڵەیل لەیەوەری ئێمە، وە مدووی نەوینێ چوارچوی سازمانی و متودییگ تایبەت لە موبارزە، هەر کام و لە هەر بەشیگی کوردستان، لە چوارچوی عەشیرەیی و بنەماڵەیی و ناوچەیی تەقەلا کردنە و وە دژ داگیرکەر وسانە و لەو ڕییە گیانفەدایی کردنە و شانازییەیل فرەییگ وە دەس هاوردنە.
وە پەی ئەوەیکە کۆمەڵگای ئەو وەختێ کوردستان سیستمیگ مکانیکی داشتییە و بنەماڵە و عەشیرە حوکم کردنە، وە داخەو نەتوێنستە وە هەدەف سەرەکی بڕەسن و داگیرکەر توێنستێە هەر جەریان و شێوەییگ لە موبارزە سەرکوت بکەیدن.
لە لای ترەک لە سەدەی لەیەوەری تا ئیسکە، هەرچەند کوردستان هەر لە ژیر سیستم کولونیالیستی بییە و هێمان نەڕسیەسە ئامانجە گشتییەگانی، وەلی جیاوازیی فرەییگ درێد وەگەردێ لەیەوەری، ئەوەیش شێوەی موبارزە و کۆمەلگای کوردەواری لە مکانیکیەو وەرەو ئورگانیک چییە، و بنەوا دانەرێ ئی جەریان تازە لە کوردایەتی، حزب دموکرات کوردستان ئێرانە.
حزبییگ ک لە ٧٧ ساڵ وەرجە ئێرنگە، لەسەر دەسێ کەسایەتییەل نیشتمان پەروەر کورد دامەرزێد و جوورێ حزبییگ مودرن دەس کەیدە سازماندهی کۆمەڵگای کوردەواری لە ڕووژهەڵات کوردستان، ک ئەساسەگان و بەرنامەی لە سەر پرەنسیپە جەهانییەگانی دونیای مودرن و ئەندیشەی ئازاد و دموکراتییکە و وە تەمای ئورگانیک وە پلان و پرۆژە و خوەنینییگ سەردەمیانە تیەیدە مەیدان و جمشت کوردی وەرەو مەسیرییگ ترەک بەید.
مەسیرییگ ک هێڵە سوورەگان ئەڕای کورد، بوودە یکسانی و حقوق بەشەر، دموکراسی و ئازادی وە گشت لایەنەگانی و لەسەر گشتیان بەرژەوەندی نیشتمانییە.
حزبییگ ک توێنست هەر لە دەس وە پێ کردنێ موبارزەی خوەی، بەش فرەییگ لە کۆمکەڵگا پەیڕوی بوون و کۆمار کوردستان دابمەرزنن، کۆمارییگ ک ئێرنگەیش ئەڕای گشتمان بنەو٧ییگە ئەڕای دامەرزانن دیارییگ ئازاد.
یەکیگ ترەک لە تایبەتمەندییەیل حزب دموکرات ئەوسە ک وەگەردێ سەردەم چوودە نوا و لە بواری ئەندیشەیی وە بەردەوامی خوەی نوو کەی و باوەڕییگ بنەوایی درێد وە کرامەت ئنسانی.
حزبییگ ک خوەی وە پیشڕەو خەبات کورد لە ڕووژهەڵات زانێد و کارنامەی کاریەگەی ئی ڕاسییە خەیدە دەر ک وە ڕاسی پیشڕەو کوردایەتییە لە کوردستان و لە باور هەزینە دان چ لە گیانفەدایی ڕەهبەرەیل و کادر و پێشمەرگە بوودن چ وە کوڵ کیشانێ بارێ کۆمەڵگای کوردستان و ئازار و ڕەنجەگان.
ئی ڕاسییە لە هویچ کەس شاراوە نییە ک حزب دموکرات سەرچاەوی خەبات مودرنە لە کوردستان، لە موبارزەی موسەلەحانە بگر ک شیوازەیل جیاواز وە کار هاوردییە و پرەنسیپەیل پارتیزانی و نزامی لە هاز پێشمەرگەی کوردستان جیگیر کردێە، ک پێشمەرگە بوودە تفەنگدارییگ موردن نە جوور وەرجە حزب، سوارەیلییگ عەشیرەیی بوون، ئەڵبەت ئەوەیش لەوەرچەو بگریمن، لێرە ک باس کەیمن لە شەڕکەرەیل دیرەک کورد، مەبەس کەم زانین نییە، سەردەم بیەسە بایس ی ک وە شێوە موبارزە بکەن و هەر ئەوانن ک ڕەوت مبارزاتی و کوردایەتی ڕساننەسە دەس ئێمە و نەیشتنە دەنگ کورد کپ بوود، لەی باسە تەنیا بەراورد و هەڵسەنگاندنییگە وەگەردێ دونیای مودرن.
لە بوار سیاسی و ئەندیشەییش بایمن باسییگ داشتوویمن وە خاسی ئی ڕاسییە ئەرامان دەرکەفێد ک وەختیگ حزب دموکرات باس لە دموکراسی و سوسیالیسم کەی و تەقالا ئەڕای کەی، هێمانیش فەرییگ لە وڵاتەیل ڕوووژهەڵات ناوڕاس باوەر وە دموکراسی و ئازادی و یکسانی نەیرن.
لە سیاسەت و ستراتژی حزب دموکرات، دەنگ جیاواز، شێوەیل ڕەوای موبارزە، موبارزەی مەدەنی، سایاسی، فەرهەنگی و... ڕەوال سەرەکی درن، لە دریژەی چالاکییەیلی فرە قەیرانییش وە چەو دییە و کەم ا کاستییش داشتیە و حزبییگە ک هاشا لە کەم ا کاستییەگان نەکردێە ، بەڵکە خەسار ناسی کردێە و شێاوزییگ ترەک گردیەسە وەر.
حزبییگ ک گوفتمان و حەوزەی چالاکی خوەی، لە ناوچەییگ تایبەت نەیشتییە و ئەندیشەییگ کوردستانی، ئەڕای سەرایسەرێ کوردستان ئێران تەقەلا کەی.
ئی ڕاسییە هەمیشە دیارییە ک حزب دموکرات کوردستان ئێران، وە پەی سیستم داگیرکەرەیل، دووخ کۆمەلگای کوردستان، دووخ ناوچەگە و جەهان، هەر بەردەوام بییە و مینێد و پەرچەمدارێ سەرەکی ڕەسین وە ئازادی نیشتمانە.
بەرز و بڵێن بوو بەیداخ ڕەنگین کوردستان.
پیرووز شاڵڕووژی دامەرزاننێ حزب دموکرات.
