![](/content/upload/1/news/55314_w920.jpg)
"مەعمەر ئەلئەڕیانی" وەزیری ڕاگەیاندنی هەواڵ و زانیارییەکانی "یەمەن" لەگەڵ ئاماژە بە دانپێدانانی تۆڕێکی دەسبەسەرکراوی حووسییەکانی ئەو وڵاتە سەبارەت بە ڕۆڵیان لە قاچاخی چەکوچۆڵ لە "بەندەرعەباس" بۆ یەمەن" داوای لە شۆرای ئەمنییەت و کۆمەڵگای جیهانی کردووە کە پێش بە هەوڵە تێکدەرانەکانی ڕێژیمی ئێران لە ناوچەکە بگرن.
"ئەلئەڕیانی" وتوویەتی کە ئەو تۆڕە پێکهاتووە لە چوار کەس کە مەلەوانن و بەشدارییان لە ڕاگواستنی چەکۆچۆڵی قاچاخ لە "بەندەرعەباس" بۆ "بەندەرئەحەدیدە"دا هەبووە.
ناوبراو هۆشداریی داوە کە ڕیژیمی ئێران لە درێژەی پشتیوانییەکانی لە حووسییەکان، یاسا نێونەتەوەییەکانی خستووەتە ململانێ و بڕیارنامەی شۆرای ئەمنییەتی لەو پەیوەندییەدا پێشێل کردووە.
وەزیری ڕاگەیاندنی هەواڵ و زانیارییەکانی "یەمەن" داوای لە کۆمەڵگای نێونەتەوەیی، شۆرای ئەمنییەت و ڕێکخراوی نەتەوە یەکگرتووەکان کردووە کە سەرەڕای مەحکوومکردنی سیاسەتە تێکدەرانەکانی ئەو ڕێژیمە، بۆ کۆتاییهێنان بە دەستێوەردانەکانی لە ناوچەکە بیخەنە ژێر گوشاری چڕوپڕەوە و لەگەڵی ڕووبەڕو ببنەوە.
"مەعمەرئەلئەڕیانی" هەروەها وتوویەتی: "ئێران کەڵکاوەژوو لە میلیشیا حووسییەکان وەردەگرێت و هانیان دەدات کە خەڵکی یەمەن بکوژن و درێژە بە ئاژاوە و ناتەبایی و نائەمنی و پەرە بە بێ سەرەوبەرەیی و تێرۆریزم لە ناوچەکە بدەن و پاڵنەرێکە بۆ هەڕەشەی سەر بەرژەوەندییە نێودەوڵەتییەکان.