بە بۆنەی ٢٥ـی گەلاوێژ ساڵڕۆژی دامەزرانی حیزبی دێموکرات لە زۆربەی شار و گوندەکانی کوردستان یادی ئەو ڕۆژە بە شکۆیەکی زۆرەوە بەرز ڕاگیرا.
لە "سەلاسی باوەجانی" ئەندامان و لایەنگرانی حیزبی دێموکرات بە بۆنەی جێژنی ٢٥ـی گەلاوێژ پیرۆزبایی ئەو جێژنەیان لە هەموو تێکۆشەرانی نێو سەنگەری خەبات و تێکۆشان، بنەماڵەی شەهیدان، زیندانیانی سیاسی، کادر، پێشمەرگە و هەموو خەڵکی کوردستان کردووە و لە هەمان کاتدا خۆشحاڵیی خۆیان بە یەکگرتنەوەی دێموکراتەکان نیشان داوە.
هەروەها لە شاری "مەریوان" و گوندی "نێ" هیواداری خۆیان نیشان داوە کە لەوەبەدوا بزووتنەوەی کوردی ڕۆژهەڵات هەموو هێز و وزەی خۆی لە دژی ڕێژیمی پەت و سێدارە بەکار ببا و ئەزموونی ناخۆش لەنێو ماڵی کورددا دووپات نەبێتەوە.
لاوانی شۆڕشگێڕ و ئازادیخوازی کوردستان لە شار و گوندەکانی کوردستان و لە بەرەبەری ٢٥ـی گەلاوێژ ڕایانگەیاندووە کە بە یەکگرتنەوەی حیزبی دێموکرات حیزبەکەی شەهیدان قازی، قاسملوو و شەرەفکەندی ورەی تازە هاتووەتەوە بەر خەڵک و ئامادەیی خۆیان بۆ بەڕێوەبردنی هەر جۆرە چالاکییەک نیشان داوە.
