ژمارەیەک لە کرێکارانی کوورەخانەی وایەگان سەر بە پارێزگای تەورێز، بەبۆنەی ٢٥ی گەلاوێژ ٧٧ـەمین ساڵیادی دامەزرانی حیزبی دێموکرات پەیامێکی پیرۆزباییان پێشکەش کرد.
بەشێک لەم پەیامەکە بەم چەشنەیە:
ئازیزان، هەروەک هەموومان ئاگادارین و دەزانیین بەداخەوە کورد بەهۆی بێ دەوڵەتی، بێ ئیمکاناتی و تەبعیز و چەوساوەیی لەلایەن ڕێژیمەکان هەندێک جار ناچارە ڕوو لە شارەکانی غەیرە کورد بکات و بۆ بژێوی ژیان لە کوورەخانەکاندا کار و کاسبی بکات و ئەو بارە قورس و گرانە بخاتە شان. هەر چۆن کۆڵبەرەکانیشمان لە سنوورە دەسکردەکان شەڵاڵی عارەقە و خۆێن دەبن بێگومان کرێکارانی کوورەخانەکانیشمان لە گەرما و قوڕدا تاوسووتوو و هیلاک و ماندوو دەبن و کات بە کات دەتوێنەوە و ئەویش بۆ نرخێکی زۆر کەم.
شایانی باسە لەگەڵ دەرکەوتن لە کوردستان و چوون بۆ شارەکانی غەیرە کورد لە بواری بوونی کارخانە و شیرکەت جیاوازییەکی یەکجار زۆر دەبینرێت کە لە کوردستان بوونیان نییە.
هەروەها کوردستان بووەتە گۆڕەپانی شەڕ و ئاڵۆزی و ڕمبازێنی چەکدارانی ڕێژیم و هیچ جۆرە خزمەتگوزارییەکی لێ ئەنجام نادرێت.
ئێمە کرێکارانی کوورەخانەکانی "وایەگان" سەر بە پارێزگای تەورێز زۆر خوشحاڵ و کەیفخۆشین بە هەواڵی یەکبوون و یەکییەتیتان، بێگومان یەکگرتن ڕەمزی سەرکەوتنە و بۆ ئێمەی کورد زۆر بەسوود و هیوابەخشە.
هەر بۆیە لێرەوە... لە کوورەخانەکانی سەر بە پارێزگای "تەورێز"ەوە ئێمەی کوردی خۆرهەڵات دەسخۆشیتان لێ دەکەین بۆ یەکگرتنەوەتان لەو رۆژە پیرۆزەدا واتا ڕۆژی ۲٥ی گەلاوێژ.
