بەپێی هەواڵی گەیشتوو بە ماڵپەڕی کوردستان میدیا خەڵک لە شاری "پیرانشار" لەگەڵ کێشەی کەمیی بێنزین بەرەڕوون و هەموو پۆمپ بێنزینەکانی نێوشار و دەوروبەریشی داخراون.
لەلایەکی دیکەوە زانیارییەکان باس لەوە دەکەن کە لەلایەن ماشینەکانەوە ڕیزێکی زۆر بۆ بێنزین گیراوە و خەڵک بەتایبەت شۆفێرەکان تووشی سەرلێشێواوی بوون.
خەڵک باس لەوە دەکەن کە ڕێژیم هەر ڕۆژ گوشارێکی جۆراوجۆر دەخاتە سەر خەڵک و شەڕی ڕەوانییان بۆ دروست دەکات.
ئەو شەڕی ڕەوانییە لە کاتێکدایە، کە دۆخی ئابووریی ئەو خەڵکە زۆر نالەبارە و ڕێژیم بەهۆی زێدەخوازی و سەپاندنی ئیدۆلۆژیی خۆی بەسەر ناوچەی ڕۆژهەڵاتی نێوەڕاست و پەرەدان بە چەکی ناوکی، لەلایەن وڵاتانەوە گەمارۆی جۆراوجۆری خراوەتە سەر و تەنانەت لە دانیشتنەکانی بەرجامدا باسێکی لەسەر باشتربوونی بژێوی ژیانی خەڵکەکەی نەکردووە.
