"جەماڵ ساڵح سلێمان" سەرۆکی گشتیی عەشیرەتی قوبادی، بەبۆنەی یەکگرتنەوەی ڕیزەکانی حیزبی دێموکرات، پەیامێکی پیرۆزبایی ئاراستەی حیزب کرد.
دەقی پەیامی ناوبراو بەم چەشنەیە:
بەناوی خودای گەورە
پەیامی پیرۆزبایی
ئەندامان و لایەنگرانی حیزبی دێموکراتی کوردستانی ئێران، بنەماڵەی سەربەرزی شەهیدان و خەڵکی شۆڕشگێڕ و کۆڵنەدەری ڕۆژهەڵاتی کوردستان، بەناوی عەشیرەتی قوبادییەوە پیرۆزباییەکی گەرمتان ئاراستە دەکەین.
هەنگاوی شێلگیرانەی یەکگرتنەوەی حیزبی دیمۆکرات دڵی هەموو کوردێکی بەئەمەگی ڕێگای کوردایەتیی خۆش کرد و پێشمانوایە قۆناغێکی گەورەیە لە جووڵانەوەی ڕزگاریخوازیی گەلی کورد لە ڕۆژهەڵاتی کوردستان و ئاسۆیەکی گەشە بۆ داهاتووی نەتەوەکەمان و سەربەخۆیی کوردستان.
ئومێد دەکەین ئەم بۆنە گرنگە ببێتە بناغەی چاندنی تۆوی برایەتی و دۆستایەتی لەنێو گەلی کورددا لە ناوەوە و دەرەوەی کوردستان.
دووبارە پیرۆزە ئەم یەکگرتنەوەیە و بەهیواین لە داهاتوودا یەکگرتنەوەی نیشتمانی چواربەشکراویش بە چاوی خۆمان ببینین.
جەماڵ ساڵح سلێمان سەرۆکی گشتیی عەشیرەتی قوبادی
٣٠ـی خەرمانانی ٢٧٢٢ـی کوردی.
٢١ـی ئابی ٢٠٢٢ـی زایینی
