پێشەوا ڕۆستەمی
بە درێژاو مێژووی نەتەوەو کوردی جە تەمامو کوردستانیەنە نەتەنیا زوڵمش وەنە کریان و وسەنشانەنە بازنێوە تەنگو تاریکی بەڵکو دوژمنە عەسڵیەکێش گردکاتێوە بیێنێ مایێ ئاژاوێ و تەفرەقەو بەینو تاکەکاو کوردی،
ئەگەر باس جە مافە سەرەتایەکاو تاکێوە کۆمەڵگای کەرمێ مەوینم کە دیسان نەتەنیا باڵانسێوە میانگین ڕانەگیریان پەی کوردێوە، گێرە بێبەش تەرین تاکێوە کۆمەڵگاو بەشەریەتیش نەسیب بیەبۆ، ئی مافە سەرەتایێ کە باسشا چەنە مەکەرم مافو حقۆقێوەنێ کە سەرتاسەرو دونیاینە جیا جە جوغرافیاو کوردستانی دریان بە گرد خەڵکێوە.
تاکێوە ئورووپایی خەم و خەفەتو ئینەیە نموەرۆ کە چێش پێدا کەرۆ پەی ئارۆی کە بنیۆش سەرو سفرەکەیشۆ
تاکێوە ئورووپایی خەمو ئانەی نموەرۆ کە زاوڕۆکەش بە کام دەرامەد بکیانۆ مەدرەسە
تاکێوە ئورووپایی خەمو ئانەی نموەرۆ کە پیربی و پەکەش کەوتە چەنی ژیواو وێش و بنەماڵەیش بەرۆڕاوە
تاکێوە ئورووپایی خەمو ئانەی نموەرۆ کە زوان و کولتوورش نمەپارێزیۆ و مەوزاش وەرو هێرشی
تاکێوە ئورووپایی خەمو ئانەی نموەرۆ کە پەروەردێوە ناسالم سەرو مەژگو ئەنداماو کۆمەڵگاکەیشەوە زاڵ بۆ
بەڵکو کەسێوە کە وڵاتانێوە وەرکەوتووەنە بژیوۆ گێرە جە کاتو ئەدا بیەیشەنە تا کاتێو مەمرۆ عەسڵەن ویریچش چەنە نەکەرۆوە.
سەرو ئی گرد زانیاریا کە مزانمێشا پرسیارێو کە وەش بۆ پەیما ئانەنە کە: ئەی تاکێوە کورد جە کوردستانەنە پەیچی مشۆم بێبەش بۆ چی ناز و نێعمەتاو ئی مافە سەرەتایا.
حیزبو دێموکراتی پێسەو پێشەنگو خەباتی جە ڕۆژهەڵاتو کوردستانیەنە هەر جە ساڵەکاو ١٣٢٤ی ڕۆجیاری کاتو ئەرە مەرزیایشەنە بە حیزبێوە نەتەوەیی و نیشتمانی ئەژناسیان و یەقینەن چی ڕاسایچەنە هەنگامەیش پەی عەمەڵی کەردەو ئی درووشمو شوعارا هۆر گێرتێنە، بەڵام مەخابن دوژمنە ون مژەکەما بە قەبووڵ نەکەردەو داو ئی مافا و ئێعلانو جەنگی وەرانوەر بە خەڵکو کوردستانی جە خۆرهەڵاتەنە حیزبو دێموکراتی ناچار بیەن بە هۆرگێرتەو ئەسڵەحەی پەی دیفاع جە وێش و پارێزناو کەرامەتو خەڵکی.
ڕژیمی ئاخوندی جە کاتو ئاومە سەرکاریشەوە تا ئیسە حیزبو دێموکراتی پێسەو دوژمنێوە سەرەکی مەوینۆ و جە پیلان گێڵناینە پەیش هیچ کاتەی پشووش نەدان،
یۆچا پیلانە قیزەوناشە ئانە بێ کە تەفرەقە بووزۆنە بەینو ئۆپۆزۆسیۆنە کوردیەکاو ئاژاوێ وەش کەرۆ تاکو ئی نەتەوە زوڵم وەنە کریا بە ئاوات و ئامانجش نەیاوۆ،
هەم خەڵک هەم حیزبەکێ وێشا خاس مزانا کە هێز نا جە دلێ یەک بیەینە و یەکڕیزیەنە،
ئارۆ بە وەشیەوە مەوینم دماو چنن ساڵا جیایی و دوەبەرەیی و دووری جە یۆی، نەتەنیا دوەباڵوو حیزبو دێموکراتی یۆشا گێرتەنۆ بە یەک ئامانج و یەک هەدەف خەبات مەکەران بەڵکو فرەتەرو حیزبەکاو ڕۆژهەڵاتی ئامێنێنە سەرو ئی باوەڕیە کە دوەبەرەیی و جیایی قودرەت و هێز وەش نمەکەرۆ بەڵکو زەعف نیشانە مەدۆ وەرانوەرو دوژمنەکەیوە،
هەر پەوکی مەوینم چننین حیزبێ ڕۆژهەڵاتیێ جە چوارچێوەو ناوەندی هاوکاریەنە دەسشا وسەنەنە دلێ دەسو یەکترینی پەی یاوای بە ئامانجێوە تایوەتی کە خەڵکەکەما ساڵانێوە فرەن بە ئاواتشەن.
یەکدەسی و یەکڕیزی نیشانەو سەرکەوتەیەن.
