دیار
ڕێژیم جومهوری ئسلامی لە ڕێ ترور و دروس کردن و پاڵپشتی لە گرووپەیل تروریستی، سەرەکی ترین دەسەڵاتییگە لە ناوچەی ڕووژهەڵات ناوڕاس ک مدووی نەمەنن ئاسایش و ئەمنیەتە و کۆمەڵگای جەهانی کردێەسە ئامانج و مەننێ خوەی لە شەڕ دوێندەو.
ئەگەر دیروک دەسەڵاتداری ئی ڕێژمە باریمنە وەر چەو خوەمان ئی ڕاسییە دەر کەفێد ک وە هوێچ شێوازییگ باوەڕ وە ئاشتی و دموکراسی و ئەمنیەت جەهانی نەیرن و تا ئێرنگە سەدان گرووپ میلیشیایی وە دەسێ ئی ڕێژیمە دروس کریانە و لە ناوچە و جەهان وڵاو بینە.
عەقڵیەتێ دەسەڵاتدارەیل ڕێژیم جومهوری ئسلامی نیشانی داس ک ئەوان وە هەر مەرجییگ مانەوەی خوەیان بان تر لە هەر باس و بابەتییگ زانن و لەی ڕاسایشە دەس دەنە هەر کار دژە ئنسانییگ، لە ڕاسی ترور و ژینوساید و شەڕ و ململانی بەرهەمەیل ئی دەسەڵاتەسە و جوور گارانتییگە ئەڕای دریژە دان وە دەسەڵاتیان.
لەی ناوە ڕێژیم زانێد ک ئرادەی خەڵق ئێران و کۆمەلگای جەهانی لە ڕاسای ئەمنیەتێ گشتی گارانتییەگانێ ڕێژیم لەبەین بەن و وەی شێوازە نیەتوێنێد بەردەوام بوود، وەی خاتریشە ساڵانییگە درێد هەوڵ دەی ک ئەسڵەحەی هەستەیی دروس بکەید و وەو مەرجە مەنن خوەی گارانتی بکەید.
ئەدەبیات و کردار دەسەڵاتدارەیل ڕێژیم جومهوری ئسلامی وە تایبەت خامنەیی ئی پەیامە ئەڕامان درێد ک دروس کردنێ ئەسلەحەی هەستەیی لە بەرنامە سەرەکییەگانێ ئی ڕێژیمەسە و پروپاگاندا و کارت فشارییگ نییە ئەڕای کۆمەڵگای جەهانی، هەرچەند تا ئیسکە دەیان ساڵە کۆمەڵگای جەهانی خەڵەتنێد و باس لەوە کەی ئامانجی دروس کردن چەک هەستەیی نییە، وەلی تەنیا و تەنیا وەخت کوشتنە تا وە ژیرە ژیرە کاروبارێ هەستەیی بوویدە سەر و لە ناکاو ڕوونەمایی بکەی لە چەکە هەستەییەگانێ و دونیا تووش شووک و مەترسی گەوراییگ بکەید.
کۆمەڵگای جەهانیی لە ڕێ تەحریم و دانیشتنەگان و بەرجام درێد هەوڵ دەی وە شێوەی یاسایی نوای ڕێژیم بگرێد ک تا ئێرنگە نەتوێنستنە سەربهەفن و ڕێژیم هەر بەردەوامە و چەن رێکار گردیەسە وەر ئەڕای وەلاڕێ بردنێ زەین کۆمەڵگای جەهانی ک یەکییگ لەوان گرسانن شەڕ و کردەوەیل تروریستیە ک جوور شەڕ نیابەت ناوی بەن و لەی ناوە ئسرائیل هەمشە ئامانج سەرەکی بییە.
چوونکە بەردەوام ڕێژیم جومهوری ئسلامی شوعارە لەبەین بردنێ ئسرائیل دەی و ڕووژانە لە ناوچەگە ئیران و ئسرائیل ڕویەڕوو یەکترەو بوون و پایگایەیل لە دەرەوەی ئێران خاڵییگن ئەڕای شاردن ناو ئێران، تا ڕێژیم بتوینێد لە پایگا هەستەییەگانی کارەیلێ بووەیدە نوا.
لەی ناوە چەندین بەرداشت لە کردەوەیل ڕێژیم هەس ک چالاکەیل سیاسی ئشارە وە پێ کەن، یەکییگ مانور سیاسی و نزامی ئێرانە و لەو باوەڕەن کە ئێران خوەی تووش شەڕ نیەکەی، لایەنییگ ترەک ئەوسە ک باويڕ وە ئەوە درن ک ڕێژیم جومهوری ئسلامی وە دڵنیایی وەرەو دەسەڵاتییگ هەستەیی چوود و مەترسییە لەسەر دونیا، لایەنییگ تریش هەس ک باس لەوە کەن ئێران هەستەیی بوودە مدووی بالانس لە ڕووژهەڵات ناوڕاس و لەی ناوە زوورمیان باس لەوە کەن ک وە یاسا و ڕێکار ناونەتەویی توێند کونترول بکریەی.
وەلی تا ئێرنگە ڕێژیم پابەند وە کام یاسای ناونەتەوەیی بییە تا ئێڕنگە بوود، کام بەڵگەنامە و سەنەد ڕێگری کردێە لە ترور و ژینوساید و شەڕەگانێ ڕێژیم جومهوری ئسلامی و ئی ڕاسییە ئەڕای گشتمان ڕووشن و دیارە ک ڕێژیم تروریست جومهوری ئسلامی پابەند نیەودە هوێچ یاسای ناونەتەوەیی و کرامەت ئنسانی و ئەمنیەت جەهانی هیچ ماناییگ ئەڕای نەیرێد و تەنیا و تەنیا مەنن و بردنە نوای سیاسەتە سیەگانێ خوەی و نووڕین ئیدئولوژیکی ئەڕای موهمە و بەس.
لە ڕاسی شەوار شووم لە ئێوارە دیارە و گشتمان توێنیمن باریمنە وەر چەو خوەمان ک ئیرانییگ هەستەیی تا چەنییگ توێنێد ئەمنیەت و ئاسایش جەهان بکەیدە قوربانی.
