کۆمەڵێک لە مامۆستایان و خوێندکارانی شارەکانی سەردەشت، شنۆ، پیرانشار، نەغەدە و مەهاباد، بەبۆنەی ٢٦ی خەرمانان سییەمین ساڵڕۆژی تێرۆری دوکتور سادق شەرەفکەندی و هاوڕێیانی بە دەستی جینایەتکارانی کۆماری ئیسلامیی ئێران، پەیامێکیان بڵاو کردەوە.
دەقی پەیامە:
خەڵکی شۆڕشگێڕی کوردستان!
بنەماڵەی سەربەرزی شەهیدان!
پێشمەرگە قارەمانەکانی حیزبی دێموکراتی کوردستانی ئێران!
٣٠ ساڵ لەمەوبەر دەستی ڕەشی تێرۆری کۆماری ئاخوندی گەیشتە یەکێک لە وەفادارترین ڕۆڵەکانی حیزب و گەلەکەمان و لە "بێرلینـ"ـی پێتەختی ئاڵمان، لە کاتێکدا تازە لە کۆنگرەی ئینتێرناسیۆناڵ سوسیالیست گەڕابووەوە و لە کۆبوونەوە لەگەڵ هێز و کەسایەتییە سیاسییەکانی ئێرانیدا بوو، هاوڕێ لەگەڵ چەند هاوڕێی تری شەهید کرا.
دوکتور سادقی شەرەفکەندی بە کردەوە سەلماندبووی کوڕی ڕۆژانی سەختی خەبات لە دژی دەسەڵاتی سەرەڕۆی ئاخوندییە و بە ئیرادەیەکی پۆڵایینەوە تەواوی خۆشییەکانی ژیانی لەپێناو ئازادی و بەختەوەریی نەتەوەکەیدا وەلانابوو و ببوو بە قوتابییەکی بەئەمەگی ڕێبازی شەهیدی سەرکردە دوکتور قاسملووی نەمر.
هەر بۆیە کەوتە بەر ڕق و قینی ئاخوندەکانەوە و لە ڕۆژی ٢٦ی خەرمانانی ١٣٧١ی هەتاوی، بە پیلانێکی ئاخوندانە گیانیان لێ‌ئەستاند و چووە ڕیزی کاروانی نەمرانەوە.
ئێمە وەکوو بەشێک لە مامۆستایان و خوێندکارانی ڕۆژهەڵاتی کوردستان، پەیمان و بەڵێن لەگەڵ کاک سەعیدی خاکەڕا، شۆڕشگێڕ، مودیری بەتوانا و بیرمەندی گەورە، نوێ دەکەینەوە تا وەدیهێنانی ئامانجەکانی لە خەبات نەوەستین و بۆ چرکەیەکیش پشوو نەدەین.
سڵاو لە گشت شەهیدانی ڕێگەی ئازادیی کوردستان بەتایبەتی شەهیدانی سەرکردە
بڕووخێ ڕێژیمی دژەئازادیی ئاخوندی
سەرکەوێ خەباتی ڕەوای گەلەکەمان بە ڕێبەرایەتیی حیزبی دێموکراتی کوردستانی ئێران
