ڕۆژی پێنجشەممە، ٢٤ی خەرمانانی ١٤٠١ی هەتاوی، کاک "حوسێن ئوستادی" ئەندامی لەمێژینە و چالاکی حیزبی دێموکرات و خەڵکی گوندی "قۆزلوو"ی سەر بە ناوچەی "هەوشار"، لە تەمەنی ٨٢ ساڵیدا ماڵاوایی لە ژیان کرد.
کاک "حوسێن" کاتی خۆی لە هێزی "بەرگری میللیـ"ـدا چەکی پارێزگاری و بەرگری لە خاک و گەل و نیشتمانەکەی لە شان کردووە.
کاک "حوسێن ئوستادی" چەندین جار لەسەر بیر و بڕوای بە ڕێبازی دێموکرات و کوردایەتی، لەلایەن ناوەندە ئەمنی و ئیتلاعاتییەکانی ڕێژیمەوە بانگهێشت و ئازار و ئەشکەنجە دراوە.
تەرمی ناوبراو لەنێو ئاپۆڕای گەرمی خەڵکی ناوچەکە و لە زێدی خۆی بە خاکی پیرۆزی کوردستان ئەسپێردرا.
حیزبی دێموکراتی کوردستانی ئێران سەرەخۆشی لە خزم و کەسوکاری ناوبراو دەکات و خۆی بە هاوبەشی خەمیان دەزانێت.
