یەکیەتیی پیشەیی مامۆستایانی کوردستانی ئێران لە بانگەوازێکدا داوا لە خەڵکی کوردستان و قوتابییانی کوردستان دەکات کە ڕۆژی چوارشەممە یەکدەست و یەکدەنگ بڕژێنە سەر شەقامەکان.
دەقی پەیامەکە بەم شێوەیە:
مامۆستایانی هێژای کورد!
قوتابییانی خوشەویستی کوردستان!
دایک و بابی قوتابییانی ئازیز!
هەر وەک ئاگادارن شۆرای هاوئاهەنگیی ڕێکخراوەکانی مامۆستایان، ڕۆژی چوارشەممە ڕێکەوتی ٦ی ڕەزبەری ١٤٠١ی هەتاوییان، وەک ڕۆژی مانگرتنی گشتی دیاری کردووە کە مامۆستایان و قوتابییان لەو ڕۆژەدا بەدژی کوشتنی ناڕەوای "ژینا ئەمینی" و دەربڕینی پشتیوانی لە ڕاپەڕین و شۆڕشی گەلانی ئێران بەدژی دەسەڵاتی سەرەڕۆ و دیکتاتۆری خامنەیی و باندەکەی بە نەچوونەوە بۆ قوتابخانەکان لە ڕۆژهەڵاتی کوردستان و مانەوە لە ماڵەکان و بەشداریکردن لە ڕاپەڕین و خوپیشاندنی ئێوارەی ڕۆژی چوارشەممە تێکەڵ بە ڕیزی لاوانی شۆڕشگێری خەباتی شارەوە بن.
یەکیەتیی پیشەیی مامۆستایانی کوردستانی ئێران داوا لە مامۆستایانی پێشڕەو و قوتابییانی شۆڕشگێری ئازیز و دایک و بابی ئازیزی قوتابییان دەکات هاوکات لەگەڵ قوتابییانی سەرانسەری ئێران بە دروشمی ژن- ژیان- ئازادی تێکەڵ بە ڕیزی ڕاپەڕین و شۆڕشی ئەمجارەی گەلانی ئێران بن.
