لەگەڵ هاتنە سەر شەقامی خەڵکی ناڕازی بە قەتڵی "ژینا ئەمینی" کچە کوردی خەڵکی سەقز، بە دەستی جینایەتکارانی ڕێژیمی کۆماری ئیسلامی، بە دەیان کەس لە خۆپیشاندەران لەلایەن هێزەکانی ڕێژیمەوە بریندار و چەندین کەسیش شەهید کراون.
بەپێی زانیارییە بڵاوکراوەکان لە میدیاکاندا، ڕۆژی دووشەممە ٢٨ی خەرمانانی ١٤٠١ی هەتاوی، پاش قەتڵی "ژینا ئەمینی" بە دەستی گەشتی ئیرشادی ڕێژیم لە تاران، خەڵکی زۆربەی شارەکانی ئێران و کوردستان، بۆ مەحکوومکردنی ئەو جینایەتە مانگرتنی گشتییان ڕاگەیاند و دووکان و بازاڕەکان بەتەواوی داخرابوون و ئێوارەی هەمان ڕۆژ بۆ دەربڕینی ناڕەزایەتی هاتنە سەر شەقامەکان و بکوژانی خامنەیی وەک هەمیشە بە دڕندانەترین شێوە وڵامی ناڕەزایەتی و مانگرتنی خەڵکیان دایەوە و بە سەدان کەس بریندار بوون.
هەر لەو خۆپیشاندانەدا چەند کەس لە شارەکانی دیواندەر، دێولان و سەقز، شەهید بوون و دەیان کەسی دیکەش لە شارەکانی سنە، سەقز، بۆکان، بانە، مەهاباد، دێولان، دیواندەرە، بریندار بوون کە لەنێو بریندارەکان ژنی بەتەمەن و منداڵی ژێر ١٨ ساڵیشی تێدایە.
کاربەدەستانی کۆماری ئیسلامیی ئێران، هەر لە سەرەتای هاتنە سەرکاریانەوە بە چاوی ئەمنییەتی لە کوردستانیان ڕوانیوە و لە هەر ڕێگایەکەوە بۆیان کرابێ هەوڵی توانەوەی کوردیان داوە.
لەو خۆپیشاندانەدا وێڕای ئەوەیکە لە شارەکانی دیکەی ئێران هێزیان بۆ سەرکوتکردنی خەڵکی کوردستان هێنابوو، تەنانەت بەزەییان بە منداڵی دە ساڵەشدا نەهاتووەتەوە و وەبەر دەسڕێژی گولـلەیان داوە.
