کرێکارانی پاڵاوگەی ئابادان لە پارێزگای ئەلئەحواز ئەمڕۆ سێشەممە ١٩ی ڕەزبەر بۆ دووەم ڕۆژ لە مانگرتن و ناڕەزایەتی بەردەوامن. ئەو کرێکارانە سەبارەت بە دۆخی خراپی ژیان و کاریان مانیان گرتوە و ناڕەزایەتییان دەربڕیوە.
مانگرتنی کرێکارانی پاڵاوگەی ئابادان ڕابردوویەکی درێژی هەیە، بەڵام لەبەر ئەوەی تا ئێستا لایەنی پەیوەندیداری ڕێژیم هیچ وەڵامێکیان بە داوای ئەو کرێکارانە نەداوەتەوە و چارەسەری کێشەکانیان نەکراوە، بەردەوام ناچار دەبن دەست لە کارەکانیان هەڵبگرن و بە مانگرتن پێوشوێنی مافخوازیی خۆیان بکەون.
کرێکارێکی پاڵاوگەی ئابادان دەڵێ ئەوان هیچ هیوایەکیان نەماوە کە لایەنی پەیوەندیداری ڕێژیم بتوانن کێشەکانیان بۆ چارەسەر بکەن، بۆیە تەنیا ڕێگایان مانگرتن و دەست لەکار کێشانەوەیە.
