لە ڕۆژانی ڕابردوودا "یاسر فەتحی موقەدەم" کوڕی ''عەباس''، ئەندام و پێشمەرگەی دێرینی حیزبی دێموکرات لە گوندی "گەلێنـ"ـی ناوچەی سنە بەهۆی ڕووداوی هاتوچۆ کۆچی دوایی کرد.
کاک "یاسر" لە بنەماڵەیەکی کوردپەروەر و و شۆڕشگێڕ لەدایک بووە و لە سەردەمی خەباتی چەکداری دژی ڕێژیمی خومەینیدا ڕوو دەکاتە ڕیزەکانی حیزبی دێموکرات و چەکی پێشمەرگایەتی هەڵدەگرێت.
ناوبراو پێشمەرگەیەکی بە تەواو مانا شۆڕشگێڕ و کارلێهاتوو بووە و چەندین ساڵ لە ڕیزەکانی حیزبدا خەباتی بۆ وەدیهێنانی ئامانجە پیرۆزەکانی حیزب و گەل کردووە.
ناوبراو دوای چەند ساڵ خەبات، دەست لە پێشمەرگایەتی هەڵدەگرێت و دەچێتەوە سەر ژیانی ئاسایی لە گوندەکەی خۆیان بەڵام هەمیشە وەفادار بە ئامانجەکانی حیزب و گەلەکەی دەمێنێتەوە.
بەداخەوە لە ڕۆژانی ڕابردوودا تووشی ڕووداوی هاتوچۆ دەبێت و گیان لەدەست دەدات.
تەرمی ناوبراو لەنێو ئاپۆڕای خەڵکی ناوچەکەدا بە خاکی پیرۆزی کوردستان ئەسپێردرا.
حیزبی دێموکراتی کوردستانی ئێران سەرەخۆشی لە خزم و کەسوکاری ناوبراو و خەڵکی ناوچەکە دەکات و خۆی بە هاوبەشی خەمیان دەزانێت.
