ڕۆژی سێشەممە ڕێکەوتی ٣ی خەزەڵوەری ١٤٠١ی هەتاوی، "مام هەمزە ئیبراهیمیان" ئەندامی لەمێژینەی حیزبی دێموکراتی کوردستانی ئێران خەڵکی گوندی "مێونە" و دانیشتووی شاری ڕەبەت بەهۆی نەخۆشی کۆچی دوایی کرد.
مام "هەمزە" کوڕی خوالێخۆشبوو حاجی ''خدری مێونە'' بوو. ناوبراو لە ساڵەکانی ٤٦ و ٤٧ی هەتاوی لەگەڵ مام حەسەنی برای پەیوەندی بە تەشکیلاتی حیزبی دێموکراتەوە دەکەن و بە فەرمی داوای ئەندامیەتی دەکەن و پەیوەندییان بە شەهیدی هەمیشەزیندوو "مینەشەمـ"ـەوە دەبێت.
دوای شکستی جووڵانەوەی چەکدارانەی ساڵەکانی ٤٦ و ٤٧، ناوبراو درێژە بە کاری تەشکیلاتی لەگەڵ حیزب دەدا و لە دوای شۆڕشی گەلانی ئێران بە ئاشکرا یارمەتی شۆڕش دەدا.
ناوبراو وەکوو ئەندامێکی چالاک ئەرکی حیزبی خۆی بەجێ دەگەیەنێت و هەمیشە ماڵی ئەوان شوێنی حەوانەوەی کادر و پێشمەرگەکان بووە.
ناوبراو وێڕای بەڕێوەبردنی کاروباری تەشکیلاتی، یەکێک لە چەکدارانی هێزی بەرگری میللی بووە و یارمەتی هێزی پێشمەرگەی داوە.
ئەو کەسانەی کە لەگەڵ مام هەمزە هاوکار بوونە شایەدی ئەوە دەدەن کە ناوبراو چەندە ئەندامێکی چالاک و کارا بووە و لەسەر ڕێبازی حیزبی دێموکرات و گەلی کورد فیداکاریی زۆری کردووە.
تەرمی ناوبراو لەنێو ئاپۆيای خەڵکی ناوچەکەدا بە خاکی پیرۆزی کوردستان ئەسپێردرا.
حیزبی دێموکراتی کوردستانی ئێران سەرەخۆشی لە خزم و کەسوکاری ناوبراو و بنەماڵەی ئیبراهیمیان و خەڵکی ناوچەی ڕەبەت دەکات و خۆی بە هاوبەشی خەمیان دەزانێت.
