ئەمڕۆ چوارشەممە ڕێکەوتی ٤ی خەزەڵوەری ١٤٠١ی هەتاوی، هاوکات لەگەڵ چلەی "ژینا ئەمینی" ناڕەزایەتی خەڵک لە شارەکانی کوردستان و ئێران بە داخستنی دووکان و بازاڕەکان دەستی پێ کرد.
دوانیوەڕۆی ئەمڕۆ لە شارەکانی مەهاباد، بۆکان، سنە، سەقز و چەندین شوێنی دیکە خۆپیشاندان دەستی پێ کردووە.
لە مەهاباد لە زۆربەی گەڕەکەکانی شار سەرەڕای جگیربوونی هێزی زۆری نیزامی لە ڕۆژێک پێشتروە و هەڕەشە لە خەڵک، خۆپیشاندان دەستی پێ کردووە و دۆخی شار ئاڵۆزە.
لە بۆکان، خەڵکی شۆڕشگێڕی شار هاتوونەتە سەر شەقامەکان و دروشمی دژی ڕێژیمیان وتووەتەوە کە شەڕ و تێکهەڵچوون لە نێوان خەڵک و هێزەکانی ڕێژیم ڕووی داوە و هێزەکانی ڕێژیم بۆ ڕووبەڕووبوونەوی خەڵک لە گازی فرمێسکڕێژ کەڵکیان وەرگرتووە و دەنگی تەقە بیستراوە.
لە سەقز لە زێدی "ژینا ئەمینی" دوای ناڕەزایەتی و خۆپیشاندان لە گۆڕستانی ئایچی، لەنێو شاری سەقزیش خۆپیشاندان دەستی پێ کردووە و خەڵک ڕق و تووڕەیی خۆیان بە دانی دەیان دروشم دژی ڕێژیمی ئێران دەربڕیوە.
لە زۆربەی شارەکان وەکوو شاری سنە و چەندین شاری دیکە هێزەکانی ڕێژیم بۆ چاوترسێنکردنی خەڵک خەریکی گێڕانی مانۆڕن و هەروەها هەڕەشە لە زۆربەی دووکاندارانی شار کراوە کە نابێ دووکانەکانیان دابخەن.
