ناوچەی بەربزین و سیدەکان لەلایەن هێزەکانی ڕێژیمەوە بەتوندی تۆپباران کرا. بەهۆی تۆپبارانەکەی سپای پاسدارانەوە زیانێکی زۆر بە ناوچەکە گەیشتووە.
ماوەی ١١ ڕۆژە سپای تێرۆریستی پاسداران ناوچە شاخاوییەکانی نێوان باشوور و ڕۆژهە‌ڵاتی کوردستان تۆپباران دەکات و خەسار و زیانێکی زۆری بە باخ و ڕەزی گوندنشینانی هەرێمی کوردستان گەیشتووە.
ئەو کردەوە تێکدەرانەی سپای پاسدارانی کۆماری ئیسلامیی ئێران لە کاتێکدایە کە لە کوردستان و ئێران خەڵکی وەزاڵەهاتوو یەکگرتووانە دژی ڕێژیمی ئێران ڕژاونەتە سەر شەقامەکان و داوای مافی ڕەوای خۆیان دەکەن.
کۆماری ئیسلامیی ئێران، سەرەڕای هەموو کێشە نێوخۆییەکانی خۆی و سەرکوتکردنی خەڵکی ناڕازی و کوشتاری خەڵکی بێتاوان کە داوای مافی ڕەوای خۆیان دەکەن، گرینگی بە داواکاریی خەڵک نادات و واز لە کردەوەی تێکدەرانە و تێرۆریستی ناهێنێ و بەردەوام ناوچە سنوورییەکان تۆپباران دەکات کە لە ئاکامی ئەو تۆپبارانە‌دا زیانێکی زۆری بە ئاژەڵداران و گوندەکانی ئەو ناوچەیە گەیاندووە.
