ئێوارەی سێشەممە، ١٢ی ڕەزبەر کۆبوونەوەی ئانلاینی دەستەی بەڕێوەبەریی کۆنگرەی نەتەوەکانی ئێرانی فێدراڵ به بەشداریی کاک مستەفا هیجری، بەرپرسی ناوەندی بەرێوەبەریی گشتیی حیزبی دیمۆکرات و هەیئەتی هاوڕێی بەڕێوە چوو!
لە بڕگەی یەکەمی کۆبوونەوەکەدا کاک مستەفا هیجری ڕاپۆرتێکی گشتیی لەسەر دۆخی ڕاپەڕینی خەڵک لە ڕۆژهەڵاتی کوردستان و دۆخی حیزبەکانی ڕۆژهەڵات بەتایبەت دوای هێرشی مووشەکیی کۆماری ئیسلامی بۆ سەر بنکە و بارەگاکانیان پێشکەش کرد. بەڕێزیان لە ڕاپۆرتەکەیدا تیشکی خستە سەر ئەوەی لەگەڵ ئەوەدا کە ئێستاش مەترسی جدیی لەسەر بنکەی حیزبەکانی ڕۆژهەڵات هەیە، بەڵام ورەی تێکۆشەرانی حیزب بەتایبەتی دوای ئەو سەرهەڵدان و خرۆشانە نوێیە هەر وەکوو هەمیشه بەرزه.
لە درێژەی کاری کۆبوونەوەکەدا کاک ئەبووبەکر مودەڕیسی، جێگیری سکرتێری کۆمەڵەی شۆڕشگێری زەحمتکێشانی کوردستانی ئێران به پێداگری لەسەر ڕاپۆرتەکەی کاک مستەفا هیجری، دۆخی خۆپیشاندان و ڕاپەرینی جەماوەری لە ئاستی ئێرانی تاوتوێ کرد و کۆدەنگیی خەڵکی ئێرانی بەرانبەر به ڕووداوەکانی ناوچە جیاوازەکان بەخاڵێکی گرینگ دانا.
یۆنس شاملی، سەرۆکی حیزبی یەکیەتیی دێموکراتیکی ئازەربایجان، وێڕای دڵخۆشبوون به ڕەوتی ڕووداوەکان ئاماژەی بەوە کرد که هێندێک لایەنی ناوەندگرا به یارمەتیی میدیا لە هەوڵی ئەوەدان سەرهەڵدانی نوێی ئێران پاوان بکەن و داوایان لە کۆنگرەی نەتەوەکانی فیدڕاڵ کرد که لەسەر ئەو باسە هەستیار بێت.
لە دڕێژەی باسەکانی کۆبوونەوەکەدا جەلیل شەرحانی، سەرۆکی حیزبی تزامون دێموکراتیکی ئەهواز، ڕاپۆرتێکی لە ڕووداوەکانی ئەهواز باس کرد و باسی ئەوەی هێنایە گۆڕێ که ڕێژیم لەو ناوچەیە بەدوای نانەوەی دووبەرەکێیە لەنێوان خەڵکی عەرەب و خەڵکانیتر، بۆیەش ناوچەی ئەهوازی به ناوچەیەکی هەستیارتر لە بەشەکانیتر دانا.
لە پەیوەندی لەگەڵ دۆخی بلووچستاندا، ناسر بۆلیدەیی، سەرۆکی حیزبی خەڵکی بلووچستان وێرای پشتڕاست‌کردنەوەی شەهیدبوونی ٨٢ کەس لە هەینی ڕابردوو لە زاهیدان، باسی لەوە کرد که ڕێژیم ئینترنێتی بلووچستانی پچڕاندووە و دەستی کردووە به ڕەشبگیر! بۆلیدەیی هەروەها گوتی: نەخۆشخانەی زاهیدان لە قەیران‌دایە و سەرەڕای نەبوونی کادر و شتوومەکی پێویست، تەنانەت خوێن و دەرمانیش لە کەمیی داوە و بۆیە چاوەڕێی ئەوە دەکرێت ڕێژەی شەهیدەکان ڕوو لە زیادبوون بکات.
لە بڕگەکانی دیکەی ئەو کۆبوونەوەیەدا لایەنەکان گەڵاڵە و بەرنامەی خۆیان بۆ درێژەدان به خۆپیشاندانەکان هێنایە بەر باس و تاوتوێیان کرد.
لە کۆتاییدا داوا کرا کە کۆبوونەوەی هاوشێوەی ئەم کۆبوونەوەیە زیاتر بگیرێ و هەموو لایەنەکان پێداگر بوون لەسەر ئەوەی پشتگیریی زیاتر لە کەسایەتیی یاسایی کۆنگرەی نەتەوەکانی ئێرانی فێدراڵ لە ئاستی ئێراندا بکرێت.
