لاوانی شۆڕشگێڕی مەهاباد بۆ پشتیوانی لە ڕاپەڕینی گەلانی ئێران و سەڵماندنی ئەو ڕاستییە کە خوێنی ڕۆڵە گیانبەختکردووەکانی ڕێگای ئازادی بەفیڕۆ ناچێت، بانگەوازێکیان ڕوو لە خەڵکی تێکۆشەری شاری مەهاباد و دەورووبەری بڵاو کردەوە.
لەو بانگەوازەدا هاتووە:
خەڵکی خەباتکار و کۆڵنەدەری مەهاباد
هەروەک دەزانن ڕێژیمی کۆماری ئیسلامیی ئێران لە دوای شەهیدکردنی ڕۆڵەی نیشتمان شەهید "سمکۆ مەولوودی" ڕووبەڕووی حەماسەی لاوانی شۆڕشگیری شار بووەوە و لە چەند کاتژمێردا شکستی هێنا، بۆیە ناچار بوو لە ڕێگای خۆفرۆشەکانیەوە کە هەموو خەڵکی مەهاباد دەیانناسن دەست بە کوشتنی گەنج و لاو و خوشکانی ئێمە بکا و پۆڵێک لە هاوشارییانی ئێمە تێکەڵ بە کاروانی شەهیدانی ڕێگای ئازادی بوون.
لێرەدا وێڕای ئەوەیکە ڕادەگەیەنین لە خوێنی ئازیزانمان خۆش نابین، ڕۆژی چوارشەممە "سەرلەبەیانی لە زانکۆ و قوتابخانەکان دەست بە شۆڕش دەکەین، لە کاتژمێر ١٢ی نیوەڕۆوە مان دەگرین و بە داخستنی دووکان و بازاڕ پەیوەست بە خەباتی سەر شەقام دەبین".
بە خەڵکی شۆڕشگێڕی مەهاباد ڕادەگەیەنین کە "لە تەواوی گەڕەک و شەقامەکانی شاری مەهاباد، شاری گۆکتەپە، شاری خەلیفان و ناوچەکانی مەحاڵ، شاروێران، شامات، مەنگۆڕایەتی و گەورکایەتی" بە کردنەوەی ئاگر و ڕێبەندان، بە گڕوتینەوە دڕێژە بە خەبات دەدەین.
ئاگادار بین کە بەرگریکردن لە خۆمان مافی خۆمانە و مانەوەمان زۆر گرینگە و
بەربڵاوی و گشتگیربوونی شۆڕش هۆکاری سەرکەوتنمانە.
