کوردستان میدیا

ماڵپەڕی ناوەندیی حیزبی دێموکراتی کوردستانی ئێران

ناوەندی هاوكاریی و كۆمەڵەی كۆمۆنیست کۆبوونەوە

17:03 - 21 خەزەڵوەر 2722

بە مەبەستی هاوئاهەنگی و هاوكاری زیاتری نێوان حیزب و لایەنەكانی رۆژهەڵاتی كوردستان، ئێوارە رۆژی 20ی خەزەڵوەر ھەر دوو شاندی ناوەندی هاوکاریی حیزبەکانی کوردستانی ئێران  و  رێكخراوی کوردستانی حیزبی كۆمۆنیستی ئێران(کۆمەڵە) كۆبوونەوە.

وەفدی كۆمەڵەی كۆمۆنیست بریتیبوون لە بەڕێزان: ئیبراهیم عەلیزادە سكرتێر، حەسەن رەحمان پەنا جێگری سكرتێر و ئەحمەد ساڵحی ئەندامی رێبەری.
وەفدی ناوەند بریتی بوون لە بەڕێزان: عومەر ئێلخانیزادە سكرتێری كۆمەڵەی زەحمەتكێشانی کوردستان و بەرپرسی دەورەیی ناوەند، ئەبوبەكر مودەریسی جێگری سکرتێری  كۆمەڵەی شۆڕشگێڕی زەحمەتکێشانی کوردستانی ئێران، محەمەد نەزیف قادری
بەرپرسی ناوەندی پەیوەندییە گشتیەکانی  و ئەندامی ناوەندی بەڕێوەبەری حدکا، عەتا ناسرسەقزی ئەندامی كومیتەی ناوەندی كۆمەڵەی زەحمەتكێشانی کوردستان.

لە دیدارەكەدا باس لە هەماهەنگی و هاودەنگی دوو لایەن لەم دەورەی ئاخێزی شۆڕشگێڕانە کرا و هەروەها قسەو باسێكی چڕوپڕ لەسەر ئاخێزەكانی ئەم دواییەی كوردستان و ئێران كرا و هەر دوو لا جەختیان لەسەر پێویستی یەكگرتوویی و پێكەوەكاركردنی هەموو حیزبەكان كردەوە و هاوڕا بوون لەسەر هەندێک خاڵی سەرەکی هاوکاری لەو قۆناغەی بزوتنەوەی کوردستان. 

ھەروەھا بڕیاردرا لە دانیشتنێکی دواتردا و زوو بە زوو پێشنیار و گەڵاڵەی دیاریکراو بۆ ڕاوێژ و هاوکاری باسی لێوە بکرێ تا هاوکاری و هاوئاهەنگی شیاوی هەلومەرجی ئێستا و دواتری کوردستان بێننە دی.
 
رێکخراوی کوردستانی حیزبی کۆمۆنیستی ئێران - کۆمەڵە

ناوەندی هاوکاری حیزبەکانی کوردستانی ئێران

٢١ی خەزەڵوەری ١٤٠١ - ١٢ی نۆڤامبری ٢٠٢٢