ناوەندی نووسەرانی کوردستان لە ڕاگەیەندراوێکدا هێرشی ڕێژیم بۆ سەر بنکەکانی حیزبەکانی ڕۆژهەڵاتی کوردستانی بەتوندی مەحکووم کردووە.
لەو ڕاگەیەندراوەدا هاتووە ئەمە یەکەم جار نییە کە سوپای پاسداران پڕەنیسیپەکانی یاسای نێودەوڵەتی دەشکێنێ و دەستدرێژی دەکاتە سەر سەروەریی خاکی هەرێمی کوردستان و پەلاماری حیزبەکانی ڕۆژهەڵات دەدات. ڕێژیمی ئیسلامی لە لێواری نەمان و سەرەونخوون‌بوون‌دایە، بۆیە بە هەموو شێوەیەک پەلاماری خەڵک دەدات و دەست ناپارێزێت و تەنانەت لە پێناو مانەوەی خۆیدا لەو دیوی سنوورەکانیش زەبر دەوەشێنێت.
ڕاگەیەندراوەکەی ناوەندی نووسەران هەروەها داوا لە هەموو لایەنە سیاسییەکان دەکات کە بە پەیامی یەکگرتوویی و پلاتفۆرمێکی نیشتمانیدا، ورەی خەڵکی کوردستان لە شەقام و لە شارەکاندا بەرز بکەنەوە. هەروەها داوا لە خەڵکی کوردستان، نووسەران و ڕووناکبیران دەکات کە بە هەرچی لە دەستیان دێ، چ لە نێوخۆ و چ لە دەرەوەی وڵات، لە پێناو ژن، ژیان ئازادیدا، پشت و پەنای شۆڕشی ژینا بن.
