لە خۆپێشاندان و ناڕەزایەتیی خەڵکی کوردستان لە ئێوارە و شەوی سێشەممە، ٢٤ی خەزەڵوەردا سێ لاوی شۆڕشگێڕ شەهید بوون.
بەپێی ڕاپۆرتی ناوەندی تەشکیلاتی حیزبی دێموکرات لە خۆپیشاندانەکانی شاری کامێراندا لاوێک بەناوی فوئاد محەممەدی شەهید کرا. فوئاد محەممەدی خێزاندار و باوکی دوو منداڵ بوو.
هەروەها زانیار ئەڵڵامورادی و عیسا بیگلەری دوو لاوی شەهیدی دیکەی شۆڕشی مافخوازیی نەتەوەی کوردن کە لە خۆپێشاندانەکانی شەوێ ڕابردووی شاری سنەدا تێكەڵ بە کاروانی شەهیدان بوون.
هەروەها لە درێژەی خۆپێشاندانەکان بۆ ئازادی و ڕزگاری لە بندەستی چەند هاونیشتمانیی دیکەی شاری کامێران بە دەستی هێزە چەکدارەکانی ڕێژیم بریندار بوون کە برینی چەند کەس لەوان قورسە.
