ڕۆژنامەکانی "کەیهان" و "جام جەم"ـی سەر بە ڕێژیمی ئێران، لە بڵاوکراوەی ڕۆژی شەممە ۲۸ی خەزەڵوەری خۆیاندا، هەڕەشەی کوشتن و توندوتیژیی زیاتر دەرحەق بە خۆپیشاندەران دەکەن.
لە بابەتگەلێکدا کە لەو ڕۆژنامانەدا بڵاو کراوەتەوە و وێنەی کوژراوانی ڕێژیمیشی لەسەرە، ئاماژە بەوە کراوە کە پێویستە حکوومەت زۆر توندوتیژانەتر لەگەڵ خۆپیشاندەران بجووڵێتەوە و هەڕەشەی کوشتنی زیاتری کردووە.
لەو ڕۆژنامانەی ڕێژیمدا خۆپیشاندەران وەکوو بکوژانی ئیجارەیی ناویان لێ براوە و وتراوە کە ڕێژیم پێویستە زۆر توندوتیژتر دژ بە خۆپیشاندەران خۆی نیشان بدا و دەست لە کوشتنیان نەپارێزێت.
هەتا ئێستا بە سەدان کەس لە خۆپیشاندەران لە کوردستان و ئێران بە دەستی هێزەکانی ڕێژیم شەهید کراون، بەڵام بەرپرسانی ڕێژیم خۆیان لەو جینایەتە بێبەری دەکرد، کەچی لە ئێستادا ڕۆژنامە و میدیاکانی ڕێژیم دەیانەوێت ڕەوایی بە جینایەتەکانی ڕێژیم بدەن.
