لە ڕۆژانی ڕابردوودا، دایە "عایشێ عەبدوڵڵاپوور" دایکی شەهید "محەممەد سدیق عەبدوڵڵاپوور" لە شاری بۆکان، لە تەمەنی ١٠١ ساڵیدا کۆچی دوایی کرد.
دایە "عایشێ" دایکێکی دڵسۆز و نیشتمانپەروەر بوو کە منداڵەکانی خۆی لەسەر ڕێچکەی کوردایەتی و نیشتمانپەروەری بار هێنابوو.
دایە "عایشێ" لەنێو خەڵکدا وەکوو دایکی شەهید، ڕێزی زۆری هەبوو و خاوەنی خۆشەویستییەکی تایبەت بوو.
یەکێک لە ئاواتەکانی دایە عایشێ ڕزگاریی کوردستان و بە ئامانجگەیشتنی گەلی کورد و وەدیهاتنی ئاواتی کوڕە شەهیدەکەی بوو کە بەداخەوە نەیدیت و بەو ئاواتەوە سەری نایەوە.
شەهید "محەممەد سدیق عەبدوڵڵاپوور" لە شاری بۆکان لەدایک بووە. دوای شۆڕشی گەلانی ئێران پەیوەستی ڕیزەکانی شۆڕش لە حیزبی دێموکرات دەبێت و لە هێزی بەیان سازمان دەدرێت. ناوبراو پێشمەرگەیەکی ئازا و بە جەربەزە و قارەمان بووە و لە زۆربەی شەڕەکان دژ بە داگیرکەران بەشدار بووە. بەداخەوە شەهید "محەممەد" لە شەڕ و تێکهەڵچوونێک لەگەڵ هێزەکانی ڕێژیم شەهید و تێکەڵ بە کاروانی سوورخەڵاتی شەهیدان دەبێت.
تەرمی دایە "عایشێ" لەنێو ئاپۆڕای خەڵکی ناوچەدا بە خاکی پیرۆزی کوردستان ئەسپێردرا.
حیزبی دێموکراتی کوردستانی ئێران سەرەخۆشی لە خزم و کەسوکاری ناوبراو و هەموو خەڵکی ناوچەی بۆکان دەکات و خۆی بە هاوبەشی خەمیان دەزانێت.
