ڕێژیم لە شاری مەهاباد حکوومەت نیزامیی لە تەواوی شاردا زاڵ کردووە و هێزەکانی ڕێژیم ڕاستەوخۆ تەقەیان لە خەڵکی شار کردووە.
بەپێی هەواڵێک کە بە ژووری ناوەندی هەوڵ گەیشتووە، ئێوارەی ڕۆژی شەممە، ٢٩ی خەزەڵوەر، کە لە هەموو گەڕەکەکانی شاری مەهاباد خۆپیشاندان و سەرهەڵدان لە ئارادا بوو، لە گوندی "خانەگێ"ی مەهابادیش خەڵک دەستیان بە خۆپیشاندان کرد و هەر زوو هێزەکانی ڕێژیم بەرەوڕووی خەڵک بوونەوە و شەڕ و دەرگیری ڕووی داوە. بەپێی ئەو زانیارییانە لە شەڕ و تێکهەڵچوونی هێزەکانی ڕێژیم و خەڵکی شۆڕشگێڕدا، کۆمەڵێک بریندار و تەنانەت دەگوترێ شەهیدیش هەیە.
هێزەکانی ڕێژیم که لە شەڕ و بەربەرەکانێی خەڵکی شار ماندوو بوون، لە هەر جۆرە چەکێک بۆ سەرکوتی خەڵک کەڵک وەردەگرن، تەنانەت تا ئەو ڕادەیەی لە ترسی پەرەسەندنی ڕاپەڕینەکان و ئەگەری دەست‌بەسەرداگرتنی دەنگ و ڕەنگ و ناوەندە گرینگە دەوڵەتییەکان هێزی تایبەت و زرێپۆشیان هیناوەتە نێو شار.
