لاوانی شۆڕشگێڕی مەهاباد لە پەیامێکدا باسیان لە هەبوونی پلانی دوژمن بۆ گۆڕینی ڕێرەوی مەدەنیی بزووتنەوەی ڕزگاریخوازیی خەڵکی ڕۆژهەڵات کرد.
دەقی پەیامەکە بەم چەشنەیە:
بەناوی شەهیدانی نوێی ڕزگاریی کوردستان و ئێران
بزووتنەوەی ڕزگاریخوازی دژی دیکتاتۆری لەو دوو مانگەدا تەواو مەدەنی بووە.
ئەو بزووتنەوە لە هەموو ئاکارەکانیدا لە توندوتیژی و کوشتار خۆی بەدوور ڕاگرتووە.
لاوان و کۆمەڵانی خەڵکی بەشدار لەو بزووتنەوە کەوتوونەتە بەر تەوژمی توندوتیژی و دەستڕێژی ڕاستە‌وخۆی هێزەکانی ڕێژیم و شەهید و برینداری زۆریان داوە، بەڵام کاری توندوتیژانەیان بەرانبەر نەکردوون.
بەداخەوە لەو ڕۆژانەدا دەستێکی مەترسیدار دەیهەوێ ڕێڕەوی مەدەنیی بزووتنەوەکە بگۆڕێت، دەستێک کە پلانەکەی لەگەڵ ویست و ئامانجی بزووتنەوەکە تەواو لێک دوورە. ئەو پیلانە لەلایەن لاوانی شۆڕشگێڕەوە بەتەواوی مەحکوومە.
هەر لەو پەیامەدا بۆ هەموو لایەک ڕوونی دەکەینەوە کە بزووتنەوەی ڕزگاریخوازیی نوێی کوردستان بە پشتبەستن بە ڕێبازی ڕەسەن و نیشتمانی لە کوردستان لەگەڵ هیچ جۆرە توندوتیژی و بەکارهێنانی چەک نییە. هەر کەس و لایەنێکیش بە هەر ناوێک بیهەوێ بزووتنەوە مەدەنی و مافخوازانەکەی خەڵکی کوردستان بەلاڕێدا بەرێت لە خۆمانی نازانین و بە پلانی دوژمنی دادەنێین.
لە کۆتاییدا دەستخۆشی لە پەیامی بەڕێز کاک مستەفا هیجری دەکەین کە بۆ دووەمین جار وێڕای داکۆکیکردن لە بەردەوامیی بزووتنەوەکە پێداگری لە سەر پاراستنی گیانی هەموو تێکۆشەران دەکات و لەسەر بەرەوپێشچوونی قۆناغ بە قۆناغی شۆڕشەکە بە شێوەی مەدەنی سوورە. ئەو پەیامە نیشان لە دڵسۆزی و بەرپرسیارەتی نەتەوەیی بەڕێزیانە.
سڵاو له شەهیدانی نوێی ڕزگاریی کوردستان و ئێران
لاوانی شۆڕشگێڕ لە مەهاباد و موکریان
