بەپێی هەواڵی گەیشتوو بە ماڵپەڕی کوردستان میدیا، بڕیارە نوێنەری وەلی فەقیهـ بچێتە کوردستان و لەگەڵ کاربەدەستانی ئیتلاعات و سپا کۆ ببێتەوە.
زانیارییەکان باس لەوە دەکەن ڕێژیم لە هەوڵدایە بنەماڵەی شەهیدانی ڕاپەڕینەکانی کوردستان بانگ بکات و ئەوان وەک "بنەماڵەی شەهید"ی خۆی لە قەڵەم بدات، بەڵام بنەماڵەی شەهیدانی ڕاپەڕینەکان ڕایانگەیاندووە ئەوان وڵامی ڕێژیمی ئێران نادەنەوە.
بەپێی زانیارییەکان ئیدارەی ئیتلاعات و سپاش ڕاسپێردراون هەندێک کەسی سەر بە خۆیان کۆ بکاتەوە و هەرچی نوێنەری وەلی فەقیهـ وتی ئەو کەسانە بۆی پشتڕاست بکەنەوە.
ڕێژیمی تاران لە هەوڵدایە کە فەرماندەی هێزی ئینتزامی و فەرمانداریی چەند شاری کوردستان بگۆڕێت.
ڕێژیم بەردەوام هەوڵ دەدات بنەماڵەی شەهیدانی ڕاپەڕینی کوردستان بۆلای خۆی ڕابکێشێت، بەڵام بنەماڵەی شەهیدان ئیرادە و ورەیان لەوە بەهێزترە فریوی ڕێژیمی ئێران بخۆن.
بنەماڵەی شەهیدانی ڕاپەڕین لە کاتی ناشتنی ڕۆڵەکانیان لە گۆڕستان بە شانازییەوە باسیان لەوە کرد کە ئەوان ڕۆڵەی کوردستانن و ڕۆڵەکانیان پێشکەش بە کوردستان کردووە.
