دایە خەدیجە ئەرشەدی دایکی شەهید عەزیز عەبدوڵاپوور و هاوسەری عەلی عەبدوڵاپوور، ئەندامی کۆمەڵەی ژێکاف، لە تەمەنی ٩١ ساڵیدا ماڵاوایی لە ژیان کرد.
ڕۆژی پێنجشەممە ٣ی سەرماوەزی ١٤٠١ی هەتاوی، دایە خەدیجە ئەرشەدی، هاوسەری کاک عەلی عەبدوڵاپوور، ئەندامی کۆمەڵەوی ژێکاف و دایکی شەهید عەزیز عەبدوڵاپوور بەهۆی هەڵکشانی تەمەنەوە لە شاری نەغەدە ماڵاوایی لە ژیان کرد.
شەهید عەزیز لە بنەماڵەیەکی کوردپەروەر و دێموکرات لەدایک بوو؛ باوکیشی هەر پێشمەرگەی سەردەمی شەهید موعینی بووە.
هەر لە مێرمنداڵییەوە هەستی کوردایەتیی هەبووە و بە باشی هەستی بە زەوتکرانی مافی خۆی و گەلەکەی کردووە.
شەهید عەزیز ساڵی ٦١ی هەتاوی بەرگی پیروزی پێشمەرگایەتی لەبەر دەکا و چەکی شەرەف بۆ بەرگری لە خاکی پیرۆزی کوردستان دەکاتە شان و دەبێتە پێشمەرگەی حیزبی دێموکراتی کوردستانی ئێران و لە هێزی شەهید ئەفشین لە شارستانی نەغەدە تێکەڵ بە ڕۆڵە چاونەترسەکانی دێموکرات و هێزی پێشمەرگە دەبێ.
شەهید عەزیز کوڕێکی زیرەک و نەترس بوو و لەنێو دۆست و هەواڵانی بە کوڕێکی چاونەترس ناسرابوو؛ بۆیە لەنێو هاوڕێ پێشمەرگەکانی و خەڵکیش خۆشەویست بوو. شەهید عەزیز لە شەڕەکانی ڕێگای مەهاباد-ورمێ، شنۆ-نەغەدە و نەغەدە-پیرانشار و شەڕی زێدی باب و باپیرانی لە گوندەکانی حەڵبێ و کۆیکان و کەرێزە بەشداریی کردووە.
شەهید عەزیز لە دوایین شەڕی لە دۆڵی بایزاوێ و لە گوندەکانی بایزاوێ، شاوەلە و دەشتی قوڕێ و کانی بداغ و کانی مەلا و گەرگولی خوارێ و سەرێ بەشدار بووە و هەر لەو شەڕەدا بەداخەوە لە گوندی کانی بداغ شەهید بووە و تێکەڵ بە کاروانی سوورخەڵاتی شەهیدانی کوردستان بووە.
حیزبی دێموکراتی کوردستانی ئێران سەرەخۆشی لە بنەماڵەی بەڕێزیان و سەرجەم خەڵکی شاری نەغەدەی کوردپەروەر دەکات وخۆی بە شەریکی خەمیان دەزانێ.
