دوکتور شۆڕش حەیدەری لە دەسبەسەرکراوانی بۆکان کە لە ڕۆژی ٢٨ی خەزەڵوەرەوە لەلایەن ناوەندە ئەمنییەتییەکانی ڕێژیمەوە گیراوە، چارەنووسی هەروا ناڕوونە.
دوکتور شۆڕش حەیدەری بە تۆمەتی تیمار و پێڕاگەیشتنی پزیشکی بە بریندارانی خۆپێشاندانەکانی شاری بۆکان گیراوە. لە ڕەوتی خۆپێشاندانە خوێناوییەکانی شاری بۆکاندا سەدان کەس بە فیشەکی شەڕ و بە مەودای نیزیک لەلایەن هێزە سەرکوتگەرەکانی ڕێژیمەوە درانە بەر دەستڕێژ.
دوکتور شۆڕش حەیدەری وێڕای هاوژینەکەی دوکتور مەدینە ئەرژەنگی لە مەجبوراوای بۆکان وەک دوو پزیشک خزمەتی خەڵکی هەژار و کەم‌داهاتی ئەو ناوچەیەی شاری بۆکان دەکەن. ئەو دوو پزیشکە خێرخواز و خۆشناوە لە بوومەلەرزەکەی چەند ساڵ لەوەپێشی کرماشانیشدا خۆبەخشانە بە هانای بریندارانی ئەو کارەساتە لە ناوچەکانی سەرپێڵ و دەشتی زەهاوەوە چووبوون.
ناوەندە ئەمنییەتییەکانی ڕێژیم لە کوردستان لە ماوەی دوو مانگ و نیوی ڕابردوودا لانیکەم چوار هەزار کەس لە خەڵکی ناڕازیی سەرشەقامەکان لە کوردستانیان دەسبەسەر کردووە کە بەشی هەرەزۆریان ئێستاش لە گرتنگەکاندا ماونەتەوە و چارەنووسیان ناڕوونە.
