لەسەر پێشنیاری ویلایەتە یەکگرتوەکانی ئەمریکا و لە کۆبوونەوەی ئەنجومەنی ئابووری و کۆمەڵایەتیی ڕێکخراوی نەتەوە یەکگرتوەکان، کۆماری ئیسلامی لە کۆمیسیۆنی مافەکانی ژنانی ئەو ڕێکخراوە دەر کرا.
کۆماری ئیسلامیی ئێران بە تاوانی پێشێلکردنی مافەکانی ژنان و سەرکوتی خۆپیشاندەرانی ئاخێزی ئەم دواییە بە زۆرینەی دەنگی ئەندامانی ئەو ئەنجومەنە دەرکرا. دەرکردنی ئێران لەو کۆمیسیۆنە لەکاتێک‌دایە کە ناڕەزایی و خۆپیشاندانی شۆڕشی نوێی ٩٠ ڕۆژی تێپەڕاند و بڵاوبوونەوەی ئەم ھەواڵەش بووە جێگای دڵخۆشی خەڵکی ڕاپەڕیوی ئێران.
ناوەندی ھاوکاریی حیزبەکانی کوردستانی ئێران وێڕای دەستخۆشی لە بڕیاری دەرکردنی ئێران لەو کۆمیسیۆنەی ڕێکخراوی نەتەوە یەکگرتوەکان داوا لە کۆمەڵگەی جیھانی و ڕێکخراوی نەتەوە یەکگرتووەکان و شوڕای ئەمنییەت دەکات بە لەبەرچاوگرتنی تاوانەکانی ڕێژیمی ئێران بەرانبەر بە خەڵکی ئازادیخواز، بەتایبەتی سەرکوتی ئەم دواییەی خەڵکی ڕاپەڕیوی ئێران و کوردستان کۆماری ئیسلامی ئێران زیاتر پەڕاوێز بخەن و لەبەرامبەر سەرکوت و ئێعدام و ئەشکەنجەی خەڵکی ئازادیخوازی ئێراندا بێدەنگ نەبن.
بژی شۆڕشی ژن، ژیان، ئازادی،
بڕوخی کۆماری ئیسلامی ئێران
ناوەندی ھاوکاریی حیزبەکانی کوردستانی ئێران
٢٥ی سەرماوەزی ١٤٠١
