ئەندامان و لایەنگرانی حیزبی دێموکراتی کوردستانی ئێران و هەروەها لاوانی شۆڕشگێر لە زۆربەی شار و گوندەکانی کوردستان بەبۆنەی ٢٦ی سەرماوەز ڕۆژی پێشمەرگەی کوردستان لە پەیامی جیاجیادا پیرۆزبایی ئەو ڕۆژیان، لە بنەماڵەی سەربەرزی شەهیدان، زیندانییانی سیاسی و پێشمەرگەکانی شار و خەباتکارانی شۆڕشی ژینا کردووە.
لە سەرجەم پەیامەکاندا هاتووە، ڕۆژی پێشمەرگەی کوردستان، ڕۆژی ڕێزگرتنە لە ڕۆڵە گیانلەسەردەست و چاونەترسەکانی هێزی پێشمەرگەی کوردستان کە کوورەی خەباتی نەتەوایەتیمانیانی پڕ بڵێسە و گەرم و بەتین ڕاگرتووە .
لە پەیامەکاندا هاتووە: شۆڕشی ژینا هەڵقوڵاوی ژینگەی کوردستان، کورد، خەبات و هزری پێشمەرگانەیە . هێرشی دڕۆن و مووشەک‌بارانەکانی ڕێژیمیش بۆ سەر بنکە و بارەگاکانی هێزی پێشمەرگەی کوردستان پشتڕاستکەرەوەی ئەو حەقیقەتەن.
لەو پەیامانەدا هاتووە کوردستان و کورد لەم ڕۆژە مەزن و پڕ شکۆیەدا شانازی بە هێزی پێشمەرگەی کوردستان دەکات و ئێمەش لەم ڕۆژە پیرۆزەدا بۆ جارێکی دیکە پەیمانی وەفاداری لەگەڵ پێشمەرگەکانی کوردستان نوێ دەکەینەوە و بەڵێن دەدەین کە هەتا گەیشتن بە ئازادی و دادپەروەری هاوخەبات و هاوڕێبازیان بین .
لەو پەیامانەدا جارێکی دیکە پیرۆزبایی ۲٦ی سەرماوەز لە هەموو لایەک دەکەین و دڵنیاتان دەکەینەوە، بە وشیارییەوە جووڵەکانی ڕێژیممان لەژێر چاودێریدایە و هەر کات حیزبی دێموکراتی کوردستانی ئێران بڕیار بدات ئامادەی گیانبازین .
