هێزە داگیرکەرەکانی ڕێژیمی کۆماری ئیسلامیی ئێران لە سنوورەکانی سەردەشت و بانە دەیان ئەسپی کۆڵبەرانیان داوەتە بەر دەسدڕێژی گوللـە.
بەپێی ڕاپۆرتی هەواڵدەریی "کوردپا" لە ماوەی ڕۆژانی ڕابردوودا، هێزە داگیرکەرەکانی ڕێژیمی ئیسلامیی ئێران لە ناوچە سنوورییەکانی شارەکانی سەردەشت و بانە، هەڵیانکوتاوەتە سەر شوێنی ئەسپی کۆڵبەرانی ئەو ناوچەیە و دەیان ئەسپیان بە تەقەی ڕاستەوخۆ کوشتووە.
ئەو جینایەتی هێزەکانی ڕێژیم لە حاڵێکدا بووە کە ئەو ئەسپانە هیچ بارێکیان پێوە نەبووە و شەو هەڵیانکوتاوەتە سەر تەویلەکانیان و کوشتوویانن.
ڕێژیمی ئێران بە درێژایی مێژووی پڕ لە جینایەتی خۆی بەردەوام لە کوردستان لە هەموو ڕوویەکەوە دەستی لە هیچ جینایەتێک نەپاراستووە و جگە لەوەیکە لەسەر سنوورەکان ڕۆژانە کۆڵبەرانی هەژار دەکوژێ ڕەحم بە ئاژەڵەکانیش ناکات.
