کاک عەبدوڵڵا لاجانی، کەسایەتیی دیاری ناوچەی پیرانشار و ئەندامی لەمێژینەی حیزبی دێموکراتی کوردستانی ئێران و برای شەهیدان کاک ساڵح و کاک قادر لاجانی، لە ناوچەی پیرانشار ماڵاوایی لە ژیان کرد.
لە ماوەی چەند ڕۆژی ڕابردوودا، کاک عەبدوڵڵا لاجانی، کەسایەتیی کۆمەڵایەتی و ئەندامی لەمێژینەی حیزبی دێموکراتی کوردستانی ئێران و برای شەهیدان کاک ساڵح و قادرلاجانی، لە گوندی "گەسگەسک"ی ناوچەی پیرانی شاری پیرانشار، بەهۆی نەخۆشییەوە ماڵاوایی لە ژیان کرد.
کاک عەبدوڵڵا لاجانی، لەسەرەتای لاوەتییەوە لەگەڵ تەشکیلاتی حیزبی دێموکرات ئاشنایەتی پەیدا دەکات و پاشان بەهۆی کار و تێکۆشانی حیزبی، وەک سەدان ئەندامی دیکەی حیزب، لەگەڵ براکانی ناچار دەبێت ڕوو بکاتە باشووری کوردستان و لە هەموو قۆناغەکانی ژیان و خەباتی حیزب لەو دەورەیەدا بەشداریی چالاکانە دەکا.
بە دەستپێکردنی ڕاپەڕینی گەلانی ئێران دژی ڕێژیمی پەهلەوی و گەڕانەوەی ڕێبەریی حیزب بۆ نێوخۆی وڵات، ئەویش وەک باقی ئەندامانی حیزب گەڕایەوە نێوخۆی کوردستان و لە ڕیزەکانی تەشکیلاتی هێزی پێشمەرگەی کوردستاندا لە ناوچەی پیرانشار دەستی بە کار و خەبات کرد.
لەو قۆناخەی ژیان و خەباتیشیدا، دەیان مەئموریەتی حیزبی و پێشمەرگانەی بەڕێوە بردن؛
پاش گیرانەوەی ناوچە ئازاد کراوەکان و دەستپێکردنی خەباتی پارتیزانی لەسەر ڕەزامەندیی کۆمیتەی حیزب لە پیرانشار، لە گوندی گەسگەسکی ناوچەی پیرانی پیرانشار، بە مەبەستی سەرپەرەستیکردنی خاوخێزانی خۆی و برا شەهیدەکانی، نیشتەجێ بوو.
کاک عەبدوڵڵا، تا دوایین هەناسەکانی، وەفادار بە ڕێبازی پیرۆزی شەهیدان مایەوە.
حیزبی دێموکراتی کوردستانی ئێران، سەرەخۆشی خۆی ئاراستەی بنەماڵە و کەسوکاری ناوبراو و هەموو خەڵکی ناوچەی پیرانشار دەکا و خۆی بە هاوبەشی خەمیان دەزانێت.
