شێخ نەجمەدین عەبدوڵڵاهی باوکی شەهید ئەسعەد عەبدوڵڵاهی، لە گوندی "حاجی مەمەدان"ی سەر بە شاری سەقز ماڵاوایی لە ژیان کرد.
لە ماوەی چەند ڕۆژی ڕابردوودا "شێخ نەجمەدین عەبدوڵڵاهی" کەسایەتیی نیشتمانپەروەر و باوکی ئەسعەد عەبدوڵڵاهی، بەهۆی نەخۆشییەوە لە گوندی "حاجی مەمەدان"ی شاری سەقز ماڵاوایی لە ژیان کرد و بۆ هەمیشە دڵە پڕ لە هیواکەی لە لێدان کەوت.
شێخ نەجمەدین لە سەردەمی ڕێژیمی پەهلەویدا بۆ ماوەی ٣ مانگ بەهۆی نیشتمانپەروەری و کوردایەتییەوە دەسبەسەر کرابوو.
پاش سەرکەوتنی شۆڕشی گەلانی ئێران، شەهید ئەسعەد عەبدوڵڵاهی، دێتە ڕیزی پێشمەرگەکانی حیزبی دێموکراتی کوردستانی ئێرانەوە و بەرگی پیرۆزی پێشمەرگایەتی لەبەر دەکا و چەکی شەرەف بۆ بەرگری لە خاکی پیرۆزی کوردستان دەکاتە شانی.
شێخ نەجمەدین لەلایەن بەکرێگیراوان و دامودەزگاکانی ڕێژیمی ئێرانەوە دەخرێتە ژێر گوشار کە دەبێ شەهید ئەسعەد بێنێتەوە و واز لە پێشمەرگایەتی بێنێت، بەڵام شێخ نەجمەدین بە ورەیەکی پۆڵاینەوە هەموو کات دژ بە ڕێژیم وەستاوەتەوە.
حیزبی دێموکراتی کوردستانی ئێران بە بۆنەی کۆچی دوایی شێخ" نەجمەدین عەبدوڵڵاهی" سەرەخۆشی لە بنەماڵە و کەسوکاری ناوبراو دەکا و خۆی بە شەریکی خەمیان دەزانێت.
