دەزگای قەزایی ڕێژیمی ئیسلامیی ئێران، وێڕای سزای لەسێدارەدان، سزای قورسی بەسەر دەسبەسەرکراوانی شۆڕشی سەرانسەریدا سەپاندووە.
ڕۆژی دووشەممە ٢٦ی بەفرانباری ١٤٠١ی هەتاوی، بەپێی ڕاپۆرتی ڕێکخراوەکانی مافی مرۆڤ، مەدەنی و چالاکانی ئێرانی، لەگەڵ سەپاندنی سزای لەسێدارەدان بەسەر ژمارەیەک خۆپیشاندەری دەسبەسەرکراودا لەلایەنی دەزگای قەزایی ڕێژیمەوە، دەسبەسەرکراوانی دیکەش سزای قورسیان بەسەردا سەپاوە، لەوانە "قەدەغەکردنی هاتوچۆی دەرەوەی ئێران و چەندین ساڵ بەندکردن".
هەروەها خوێندکاران و چالاکانی مەدەنی سزای چەند ساڵ بەندکران و گواستنەوەیان بۆ شارەکانی دیکەی ئێرانیان بەسەردا سەپێندراوە.
لە ڕاپۆرتی ناوەندەکانی مافی مرۆڤی ئێران هاتووە کە لە درێژەی خۆپیشاندانە سەرانسەرییەکان دژی کۆماری ئیسلامی، زیاتر لە ١٩هەزار کەس دەسبەسەر کراون و ژمارەیەکی زۆر لە دەسبەسەرکراوان چالاکانی مەدەنی و سیاسی بوون کە زۆربەیان لە ماڵەکانی خۆیان دەسبەسەر کراون نەک لەنێو خۆپیشاندەران.
