ڕۆژی دووشەممە ٢٦ی بەفرانباری ١٤٠١ی هەتاوی، کوردسانییان و ئێرانییانی دەرەوەی وڵات لە شاری ستاسبۆرگی فەرانسە، لە بەردەم پارلمانی ئورووپا خۆپیشاندانێکی بەربڵاویان بەڕێوە برد و داوایان کرد کە یەکیەتیی ئورووپا ناوی سپای پاسداران وەکوو ڕێکخراوێکی تێرۆریستی ڕابگەیەنێت.
لەو پێوەندییەدا سەرۆکی پارلمانی ئورووپا پشتیوانیی خۆیان بۆ خۆپیشاندەران ڕاگەیاند و وتی: ئێوە لەلای ڕاست و دروستی مێژوو ڕاوەستاون و بێگومان مێژوویەکی جوان و دروست تۆمار دەکەن و ئێمەش هەمیشە پشتیوانی لە خواستەکانی ئێوە دەکەین.
"ڕۆبێرتا مەتسۆلا" سەرۆکی پارلمانی ئورووپا کە لەو خۆپیشاندانە بەرینەدا بەشداریی کرد و ڕوو بە خەڵکی نەتەوەکانی ئێران وتی: ئەوەی ئەمڕۆ ڕوو دەدات ڕەوتێکی جوانی مێژووییە و بێگومان ئێوە سەردەکەون. ئورووپا هەمیشە پشتیوانیی لە گەلانی ئێران کردووە و بەردەوامیش پشتیوانییان لێ دەکات.
ناوبراو زیادی کرد: وڵاتانی ئورووپایی بۆ پشتیوانی لە گەلانی ئێران گوشاریان خستووەتە سەر یەکیەتیی ئورووپا بۆ ئەوەی سپای پاسداران وەکوو ڕێکخراوێکی تێرۆریستی بناسێنێت.
