خەڵکی ڕاپەڕیوی جوانڕۆ لە درێژەی ڕاپەڕینە سەرانسەرییەکاندا بە دەستی بەتاڵ ڕووبەڕووی هێزە داگیرکەرەکانی ڕێژیم بوونەوە.
ڕۆژی شەممە، ١٠ی بەفرانباری ١٤٠١ی هەتاوی، کچان و کوڕانی قارەمانی شاری جوانڕۆ دوای ئەوەیکە هێزە داگیرکەرەکانی کۆماری ئیسلامیی ئێران ڕێگەیان نەدا ڕێوڕەسمی چلەی ماتەمینیی شەهیدانی ئەو شارە بەڕێوە بچێ، لەگەڵ هێزە سەرکوتکەرەکانی ڕێژیم ڕووبەڕوو بوونەوە و هێزەکانی ڕێژیمی ئێران بە تەقەی ڕاستەوخۆ و گازی فرمێسکڕێژ هێرشیان کردە سەر خەڵک و لە ئاکامدا لاوێک شەهید و چەند کەسیش بریندار بوون.
خەڵکی شۆڕشگێڕی جوانڕۆ دوای شەهیدکرانی لاوێکی شۆڕشگێڕی ئەو شارە بە ناوی بۆرهان ئەلیاسی، زۆربەی شەقامەکانی شاریان کۆنتڕۆڵ کرد و هێزە داگیرکەرەکانیان ڕاو نا و ژمارەیەک دامودەزگای حکوومی و مۆڵگەی سپای تێرۆریستیی پاسدارانیش کەوتە بەر هێرشی ڕق و تووڕەیی خەڵکی ڕاپەڕیو.
هەروەها لاوانی بوێری جوانڕۆ بۆ ئەوەی هێزی زۆرتری ڕێژیم نەیەتە نێو شار، بازگەی پشکنینی ڕێگای نێوان جوانڕۆ و ڕوانسەریان ئاگر تێبەردا و هێزە چەکداراەکانی ڕێژیمیش ئەو بازگەیەیان چۆڵ کرد.
