ڕێژیمی ئێران کە لە لێواری ڕووخاندایە، بەبۆنەی ٢٢ی بەهمەن، لە هەموو ڕێگایەکەوە لە هەوڵدایە کە خەڵکی کوردستان بێنێتە سەر شەقام، هەتا بەم شێوەیە نیشان بدات لەنێو خەڵکدا ڕەوایی هەیە و دۆخی ئەو وڵاتە ئاساییە.
بەپێی هەواڵی گەیشتوو بە ژووری هەواڵی ناوەندی ڕاگەیاندنی حیزبی دێموکرات، دەستوپێوەندییەکانی ڕێژیمی ئێران لە شاری ''سیمینە''ی سەر بە بۆکان و گوندەکانی دەوروبەری، بە وەرزێڕانیان وتووە کە هەر کەس بەبۆنەی ٢٢ی بەهمەن بە تراکتۆر بێتە سەر شەقام و ڕێژە بڕوات، ١٠ کیسە کوتی شیمیایی پێ دەدەن.
هەروەها سپای پاسداران و ئیدارەی ئیتلاعاتی ڕێژیم لە شاری بانە بەبۆنەی دەیەی فەجر و ٢٢ی بەهمەن، تاقمێک باشگا و ڕاهێنەری هەڵخەڵەتاوی ئەو شارەی ڕاسپاردووە کە منداڵ و لاوانی وەرزشکاری ئەو شارە بە مەبەستی کێبڕکێی وەرزشی ببەن بۆ شاری سنە و ڕێژیم لەنێو خەڵک و میدیاکانیدا وا چەواشەکاری بکات کە کوردستان لەم کات و ساتە ھەستیارەدا ئارامە و خەڵک دژی ڕێژیم نین.
لەلایەکی ترەوە ئیدارەی پەروەردە و بارهێنانی کۆماری ئیسلامی لە نامەیەکی هەڕەشەئامێزی تایبەتدا کە ناردوویەتی بۆ قوتابخانەکانی ڕۆژهەڵاتی کوردستان، داوای لە مامۆستایان کردووە کە دەبێ لە ڕێپێوانی حکوومەتیی ٢٢ی بەهمەندا بەشداری بکەن و ئەم بابەتە کاریگەریی لەسەر مووچە، هەڵسەنگاندن و پلەبەندیی مامۆستایان دەبێت.
بەگشتی ڕێژیمی ئێران لە هەموو پیلان و هەڕەشەیەک کەڵک وەردەگرێت تاکوو بە زۆرەملێ کۆمەڵێک کەس بێنێتە سەر شەقام و وەها بنوێنێت کە خەڵک پشتیوانی ئەو ڕێژیمەن، بەڵام هەموو کات ئەم هەوڵ و پیلانانەی ڕێژیم لەلایەن خەڵکی هۆشیاری کوردستانەوە پووچەڵ دەکرێنەوە.
شایانی باسە کە لە ماوەی ڕۆژانی ڕابردوودا بەردەوام خەڵک و لاوانی شۆڕشگێڕی کوردستان بۆ دژایەتیکردنی کۆماری ئیسلامی، بەنێرە تەبلیغاتییەکانی ڕێژیم بۆ ٢٢ی بەهمەنیان لە شەقام و کۆڵانەکان دەسووتاند.
