سەیوان ئیبراهیمی، سروە پوورمحەممەدی و سۆما پوورمحەممەدی، ئەندامانی دەستەی بەڕێوەبەریی ئەنجومەنی فەرهەنگی- کۆمەڵایەتیی نۆژین بە دانانی بارمتە و بە شێوەی کاتی ئازاد کران.
بەپێی ڕاپۆرتی ناوەندی مافی مرۆڤ بۆ ڕۆژهەڵات "چاونیوز"، ڕۆژی دووشەممە ٢٤ی ڕێبەندانی ١٤٠١ی هەتاوی، سێ کەس لە ئەندامانی دەسبەسەرکراوی ئەنجومەنی فەرهەنگی- کۆمەڵایەتیی "نۆژینـ"ـی سنە بە ناوەکانی "سەیوان ئیبراهیمی، سروە پوورمحەممەدی و سۆما پوورمحەممەدی" کە لە ڕەوتی شۆڕشی ژینا لەلایەن هێزەکانی ڕێژیمەوە لە شاری سنە دەسبەسەر کرابوون، بە دانانی بارمتە و بە شێوەی کاتی تا بەڕێوەچوونی دادگاییەکەیان لە بەندیخانە ئازاد کران.
"سەیوان ئیبراهیمی و سۆما پوور محەممەدی" ڕێکەوتی ٢٨ی بەفرانباری ١٤٠١ی هەتاوی و "سروە پوورمحەممەدی" ڕێکەوتی ٩ی ڕێبەندانی ١٤٠١ی هەتاوی لەلایەن هێزەکانی ڕێژیمەوە بەبێ هیچ بەڵگەیەکی یاسایی دەسبەسەر کرابوون.
جێگەی ئاماژەیە کە لە ماوەی ڕۆژانی ڕابردوودا "زارا محەممەدی، ئیدریس مینبەری و واران محەممەدنژاد" لە بەندیخانە ئازاد کران.
