ڕادیۆ فەرانسە لە زاری کارناسانی ڕۆژهەڵاتی ناوەڕاست ڕایگەیاند: فەرانسە لەو ماوانەی دواییدا ڕاستەوخۆ هەڵوێستی خۆی لەهەمبەر کۆماری ئیسلامی گۆڕیوە و پشتیوانی لە دژبەرانی ڕێژیم دەکات.
ڕۆژی دووشەممە ١٧ی ڕێبەندانی ١٤٠١ی هەتاوی، "دەیوید ڕیگۆلە ڕۆز"، کارناسی ڕۆژهەڵاتی ناوەڕاست، لەبارەی گۆڕینی هەڵوێست و سیاستەکانی دەوڵەتی فەرانسە لەهەمبەر کۆماری ئیسلامی، بە ڕادیۆ فەرانسەی وت: ئەوەیکە فەرانسە پشتیوانی لە خۆپیشاندەران و ژنانی شۆڕشگێڕی گەلانی ئێران دەکات، نیشانەی ئەوەیە کە پاریس بە تەواوی خەریکە لە بەرامبەر کۆماری ئیسلامی سیاسەتەکانی دەگۆڕێت و هەڵوێستی دیکەی دەبێت.
ناوبراو لە درێژەی قسەکانیدا وتی: ئەمانوئێل مەکڕۆن، سەرۆککۆماری فەرانسە، ڕێزی تایبەتی خۆی بۆ ژنانی بوێری گەلانی ئێران دربڕیوە و لە چوارچێوەی ئەو شۆڕشەی کە دژی کۆماری ئیسلامی دەستیان پێ کردووە، پشتیوانییان لێ دەکات.
ئەو کارناسە باسی لەوەش کرد کە پێوەندیی تاران و پاریس لە ئێستادا ئاڵۆزە و هیچ بەرەوپێشچوونێکی نییە. فەرانسە لە بەرامبەر سەرکوتکردنی خوێناویی خۆپیشاندەران لەلایەن ڕێژیمی ئێرانەوە، هەڵوێستی توندی نواندووە و بە توندی ئەو تاوانانەی کۆماری ئیسلامیی مەحکووم کردووە.
