ئەندامان و لایەنگرانی حیزب لە شاری بۆکان، لە چالاکییەکی سیاسی و تەبلیغیدا، یادی شەهیدانی شۆڕشی "ژینا"یان بەرز ڕاگرت.
بەپێی ئەو گرتە ڤیدیۆیەی کە بە ژووری هەواڵی ناوەندی ڕاگەیاندنی حیزبی دێموکراتی کوردستانی ئێران گەیشتووە، شەوی دووشەممە ١٧ی ڕێبەندانی ١٤٠١ی هەتاوی، ئەندامان و لایەنگرانی حیزبی دێموکرات لە شاری بۆکان، بە مەبەستی بەرزڕاگرتنی یادی شەهیدانی شار و شاخ و هەروەها شەهیدانی نوێی شۆڕشی "ژینا"، چالاکییەکی تەبلیغیی بێ وێنەیان لەنێو شاری بۆکان بەڕێوە برد.
ئەندامانی بوێری حیزب و وەفادار بە ڕێبازی حیزبی دێموکرات، شەوی ڕابردوو بە بڵاوکردنەوەی وێنەی شەهیدانی شۆڕش لەنێو شاری بۆکان، پەیمانی وەفاداریی خۆیانیان لەگەڵ شەهیدانی کوردستان و ڕێبازی پڕ لە سەروەریی حیزبی دێموکرات دووپات کردەوە.
حیزبی دێموکراتی کوردستانی ئێران وێڕای دەستخۆشی و ماندوونەبوونی لە ئەندامان و لایەنگرانی لە نێوخۆی وڵات، هیوای بەردەوامبوونیان لە ئەرکە حیزبی و نیشتمانییەکاندا بۆ بە ئاوات دەخوازێت.
